៤៩៦. ភិក្ខាបរម្បរជាតកំ (១៣)

២៧០. សុខុមាលរូបំ ទិស្វា [ទិស្វាន (ក. សី. អដ្ឋ.)], រដ្ឋា វិវនមាគតំ;

កូដាគារវរូបេតំ, មហាសយនមុបាសិតំ [មុបោចិតំ (ពហូសុ)].

២៧១. តស្ស តេ បេមកេនាហំ, អទាសិំ វឌ្ឍមោទនំ [ពទ្ធមោទនំ (សី. បី.)];

សាលីនំ វិចិតំ ភត្តំ, សុចិំ មំសូបសេចនំ.

២៧២. តំ ត្វំ ភត្តំ បដិគ្គយ្ហ, ព្រាហ្មណស្ស អទាសយិ [អទាបយិ (សី. ស្យា. បី.)];

អត្តានំ [អត្តនា (បី. អដ្ឋ. បាឋន្តរំ)] អនសិត្វាន, កោយំ ធម្មោ នមត្ថុ តេ.

២៧៣. អាចរិយោ ព្រាហ្មណោ មយ្ហំ, កិច្ចាកិច្ចេសុ ព្យាវដោ [វាវដោ (ក.)];

គរុ ច អាមន្តនីយោ [អាមន្តណីយោ (សី. បី.)] ច, ទាតុមរហាមិ ភោជនំ.

២៧៤. ព្រាហ្មណំ ទានិ បុច្ឆាមិ, គោតមំ រាជបូជិតំ;

រាជា តេ ភត្តំ បាទាសិ, សុចិំ មំសូបសេចនំ.

២៧៥. តំ ត្វំ ភត្តំ បដិគ្គយ្ហ, ឥសិស្ស ភោជនំ អទា;

អខេត្តញ្ញូសិ ទានស្ស, កោយំ ធម្មោ នមត្ថុ តេ.

២៧៦. ភរាមិ បុត្ត [បុត្តេ (សី. បី.)] ទារេ ច, ឃរេសុ គធិតោ [គថិតោ (សី. បី.)] អហំ;

ភុញ្ជេ មានុសកេ កាមេ, អនុសាសាមិ រាជិនោ.

២៧៧. អារញ្ញិកស្ស [អារញ្ញកស្ស (សី. បី.)] ឥសិនោ, ចិររត្តំ តបស្សិនោ;

វុឌ្ឍស្ស ភាវិតត្តស្ស, ទាតុមរហាមិ ភោជនំ.

២៧៨. ឥសិញ្ច ទានិ បុច្ឆាមិ, កិសំ ធមនិសន្ថតំ;

បរូឡ្ហកច្ឆនខលោមំ, បង្កទន្តំ រជស្សិរំ.

២៧៩. ឯកោ អរញ្ញេ វិហរសិ [វិហាសិ (ក.)], នាវកង្ខសិ ជីវិតំ;

ភិក្ខុ កេន តយា សេយ្យោ, យស្ស ត្វំ ភោជនំ អទា.

២៨០. ខណន្តាលុកលម្ពានិ [ខណមាលុកលម្ពានិ (ស្យា. ក.)], ពិលាលិតក្កលានិ ច [ពិឡាលិតក្កឡានិ ច (សី. បី.)];

ធុនំ សាមាកនីវារំ, សង្ឃារិយំ បសារិយំ [សំហារិយំ បហារិយំ (ស្យា.), សំសារិយំ បសារិយំ (ក.)].

២៨១. សាកំ ភិសំ មធុំ មំសំ, ពទរាមលកានិ ច;

តានិ អាហរិត្វា [អាហត្វ (សី. ស្យា.)] ភុញ្ជាមិ, អត្ថិ មេ សោ បរិគ្គហោ.

២៨២. បចន្តោ អបចន្តស្ស, អមមស្ស សកិញ្ចនោ [អកិញ្ចនោ (ក.)];

អនាទានស្ស សាទានោ, ទាតុមរហាមិ ភោជនំ.

២៨៣. ភិក្ខុញ្ច ទានិ បុច្ឆាមិ, តុណ្ហីមាសីន សុព្ពតំ;

ឥសិ តេ ភត្តំ បាទាសិ, សុចិំ មំសូបសេចនំ.

២៨៤. តំ ត្វំ ភត្តំ បដិគ្គយ្ហ, តុណ្ហី ភុញ្ជសិ ឯកកោ;

នាញ្ញំ កញ្ចិ [កិញ្ចិ (ក.)] និមន្តេសិ, កោយំ ធម្មោ នមត្ថុ តេ.

២៨៥. ន បចាមិ ន បាចេមិ, ន ឆិន្ទាមិ ន ឆេទយេ;

តំ មំ អកិញ្ចនំ ញត្វា, សព្ពបាបេហិ អារតំ.

២៨៦. វាមេន ភិក្ខមាទាយ, ទក្ខិណេន កមណ្ឌលុំ;

ឥសិ មេ ភត្តំ បាទាសិ, សុចិំ មំសូបសេចនំ.

២៨៧. ឯតេ ហិ ទាតុមរហន្តិ, សមមា សបរិគ្គហា;

បច្ចនីកមហំ មញ្ញេ, យោ ទាតារំ និមន្តយេ.

២៨៨. អត្ថាយ វត មេ អជ្ជ, ឥធាគច្ឆិ រថេសភោ;

សោហំ អជ្ជ បជានាមិ [ឥតោ បុព្ពេ ន ជានាមិ (សី. បី.)], យត្ថ ទិន្នំ មហប្ផលំ.

២៨៩. រដ្ឋេសុ គិទ្ធា រាជានោ, កិច្ចាកិច្ចេសុ ព្រាហ្មណា;

ឥសី មូលផលេ គិទ្ធា, វិប្បមុត្តា ច ភិក្ខវោតិ.

ភិក្ខាបរម្បរជាតកំ តេរសមំ.

តស្សុទ្ទានំ –

សុវ កិន្នរ មុក្ក ខរាជិនសោ, ភិសជាត មហេសិ កបោតវរោ;

អថ មោរ សតច្ឆក វាណិជកោ, អថ រាជ សព្រាហ្មណ ភិក្ខបរន្តិ.

បកិណ្ណកនិបាតំ និដ្ឋិតំ.