៤៩៥. ទសព្រាហ្មណជាតកំ (១២)

២២២. រាជា អវោច វិធុរំ, ធម្មកាមោ យុធិដ្ឋិលោ;

ព្រាហ្មណេ វិធុរ បរិយេស, សីលវន្តេ ពហុស្សុតេ.

២២៣. វិរតេ មេថុនា ធម្មា, យេ មេ ភុញ្ជេយ្យុ [ភុញ្ជេយ្យុំ (សី.)] ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២២៤. ទុល្លភា ព្រាហ្មណា ទេវ, សីលវន្តោ ពហុស្សុតា;

វិរតា មេថុនា ធម្មា, យេ តេ ភុញ្ជេយ្យុ ភោជនំ.

២២៥. ទស ខលុ មហារាជ, យា តា ព្រាហ្មណជាតិយោ;

តេសំ វិភង្គំ វិចយំ [វិចិយ (ក.)], វិត្ថារេន សុណោហិ មេ.

២២៦. បសិព្ពកេ គហេត្វាន, បុណ្ណេ មូលស្ស សំវុតេ;

ឱសធិកាយោ [ឱសធិកាយេ (ស្យា. ក.)] គន្ថេន្តិ, ន្ហាបយន្តិ [នហាយន្តិ (សី. បី.)] ជបន្តិ ច.

២២៧. តិកិច្ឆកសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២២៨. អបេតា តេ ច [តេ (សី. បី.)] ព្រហ្មញ្ញា,

(ឥតិ រាជា [រាជា ច (ស្យា. ក.)] កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២២៩. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៣០. កិង្កិណិកាយោ [កិង្កណិកាយោ (ក.), កិង្កិណិយោ (ស្យា.)] គហេត្វា [គហេត្វាន (សី. ស្យា. បី.)], ឃោសេន្តិ បុរតោបិ តេ;

បេសនានិបិ គច្ឆន្តិ, រថចរិយាសុ សិក្ខរេ.

២៣១. បរិចារកសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៣២. អបេតា តេ ច ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៣៣. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៣៤. កមណ្ឌលុំ គហេត្វាន, វង្កទណ្ឌញ្ច ព្រាហ្មណា;

បច្ចុបេស្សន្តិ រាជានោ, គាមេសុ និគមេសុ ច;

នាទិន្នេ វុដ្ឋហិស្សាម, គាមម្ហិ វា វនម្ហិ វា [វាមម្ហិ ច វនម្ហិ ច (សី. បី.), គាមម្ហិ និគមម្ហិ វា (ស្យា.)].

២៣៥. និគ្គាហកសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៣៦. អបេតា តេ ច ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៣៧. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៣៨. បរូឡ្ហកច្ឆនខលោមា, បង្កទន្តា រជស្សិរា;

ឱកិណ្ណា រជរេណូហិ, យាចកា វិចរន្តិ តេ.

២៣៩. ខាណុឃាតសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៤០. អបេតា តេ ច ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៤១. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៤២. ហរីតកំ [ហរីដកំ (ពហូសុ)] អាមលកំ, អម្ពំ ជម្ពុំ វិភីតកំ [អម្ពជម្ពុវិភីដកំ (សី. បី.)];

លពុជំ ទន្តបោណានិ, ពេលុវា ពទរានិ ច.

២៤៣. រាជាយតនំ ឧច្ឆុ-បុដំ, ធូមនេត្តំ មធុ-អញ្ជនំ;

ឧច្ចាវចានិ បណិយានិ, វិបណេន្តិ ជនាធិប.

២៤៤. វាណិជកសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៤៥. អបេតា តេ ច ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៤៦. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៤៧. កសិ-វាណិជ្ជំ [កសិំ វណិជ្ជំ (សី. បី.)] ការេន្តិ, បោសយន្តិ អជេឡកេ;

កុមារិយោ បវេច្ឆន្តិ, វិវាហន្តាវហន្តិ ច.

២៤៨. សមា អម្ពដ្ឋវេស្សេហិ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៤៩. អបេតា តេ ច ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៥០. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៥១. និក្ខិត្តភិក្ខំ ភុញ្ជន្តិ, គាមេស្វេកេ បុរោហិតា;

ពហូ តេ [នេ (ស្យា. ក.)] បរិបុច្ឆន្តិ, អណ្ឌច្ឆេទា និលញ្ឆកា [តិលញ្ឆកា (បី.)].

២៥២. បសូបិ តត្ថ ហញ្ញន្តិ, មហិំសា សូករា អជា;

គោឃាតកសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៥៣. អបេតា តេ ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៥៤. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៥៥. អសិចម្មំ គហេត្វាន, ខគ្គំ បគ្គយ្ហ ព្រាហ្មណា;

វេស្សបថេសុ តិដ្ឋន្តិ, សត្ថំ អព្ពាហយន្តិបិ.

២៥៦. សមា គោបនិសាទេហិ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៥៧. អបេតា តេ ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៥៨. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៥៩. អរញ្ញេ កុដិកំ កត្វា, កូដានិ ការយន្តិ តេ;

សសពិឡារេ ពាធេន្តិ, អាគោធា មច្ឆកច្ឆបំ.

២៦០. តេ លុទ្ទកសមា រាជ [លុទ្ទកា តេ មហារាជ (សី. បី.)], តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៦១. អបេតា តេ ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៦២. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៦៣. អញ្ញេ ធនស្ស កាមា ហិ, ហេដ្ឋាមញ្ចេ បសក្កិតា [បសក្ខិតា (សី. ស្យា. បី.)];

រាជានោ ឧបរិ ន្ហាយន្តិ, សោមយាគេ ឧបដ្ឋិតេ.

២៦៤. មលមជ្ជកសមា រាជ, តេបិ វុច្ចន្តិ ព្រាហ្មណា;

អក្ខាតា តេ មហារាជ, តាទិសេ និបតាមសេ.

២៦៥. អបេតា តេ ព្រហ្មញ្ញា,

(ឥតិ រាជា កោរព្យោ)

ន តេ វុច្ចន្តិ ព្រាហ្មណា;

អញ្ញេ វិធុរ បរិយេស, សីលវន្តេ ពហុស្សុតេ.

២៦៦. វិរតេ មេថុនា ធម្មា, យេ មេ ភុញ្ជេយ្យុ ភោជនំ;

ទក្ខិណំ សម្ម ទស្សាម, យត្ថ ទិន្នំ មហប្ផលំ.

២៦៧. អត្ថិ ខោ ព្រាហ្មណា ទេវ, សីលវន្តោ ពហុស្សុតា;

វិរតា មេថុនា ធម្មា, យេ តេ ភុញ្ជេយ្យុ ភោជនំ.

២៦៨. ឯកញ្ច ភត្តំ ភុញ្ជន្តិ, ន ច មជ្ជំ បិវន្តិ តេ;

អក្ខាតា តេ មហារាជ, តាទិសេ និបតាមសេ.

២៦៩. ឯតេ ខោ ព្រាហ្មណា វិធុរ, សីលវន្តោ ពហុស្សុតា;

ឯតេ វិធុរ បរិយេស, ខិប្បញ្ច នេ [ខិប្បំវ នេ (ក.)] និមន្តយាតិ.

ទសព្រាហ្មណជាតកំ ទ្វាទសមំ.