៤៩៤. សាធិនជាតកំ (១១)

២០២. អព្ភុតោ វត លោកស្មិំ, ឧប្បជ្ជិ លោមហំសនោ;

ទិព្ពោ រថោ បាតុរហុ, វេទេហស្ស យសស្សិនោ.

២០៣. ទេវបុត្តោ មហិទ្ធិកោ, មាតលិ [មាតលី (សី.)] ទេវសារថិ;

និមន្តយិត្ថ រាជានំ, វេទេហំ មិថិលគ្គហំ.

២០៤. ឯហិមំ រថមារុយ្ហ, រាជសេដ្ឋ ទិសម្បតិ;

ទេវា ទស្សនកាមា តេ, តាវតិំសា សឥន្ទកា;

សរមានា ហិ តេ ទេវា, សុធម្មាយំ សមច្ឆរេ.

២០៥. តតោ ច រាជា សាធិនោ [សាធីនោ (សី. បី.)], វេទេហោ មិថិលគ្គហោ [បមុខោ រថមារុហិ (សី. បី.)];

សហស្សយុត្តមារុយ្ហ [យុត្តំ អភិរុយ្ហ (សី.)], អគា ទេវាន សន្តិកេ;

តំ ទេវា បដិនន្ទិំសុ, ទិស្វា រាជានមាគតំ.

២០៦. ស្វាគតំ តេ មហារាជ, អថោ តេ អទុរាគតំ;

និសីទ ទានិ រាជីសិ [រាជិសិ (សី. ស្យា. បី.)], ទេវរាជស្ស សន្តិកេ.

២០៧. សក្កោបិ បដិនន្ទិត្ថ, វេទេហំ មិថិលគ្គហំ;

និមន្តយិត្ថ [និមន្តយី ច (សី. បី.)] កាមេហិ, អាសនេន ច វាសវោ.

២០៨. សាធុ ខោសិ អនុប្បត្តោ, អាវាសំ វសវត្តិនំ;

វស ទេវេសុ រាជីសិ, សព្ពកាមសមិទ្ធិសុ;

តាវតិំសេសុ ទេវេសុ, ភុញ្ជ កាមេ អមានុសេ.

២០៩. អហំ បុរេ សគ្គគតោ រមាមិ, នច្ចេហិ គីតេហិ ច វាទិតេហិ;

សោ ទានិ អជ្ជ ន រមាមិ សគ្គេ, អាយុំ នុ ខីណោ [ខីណំ (ស្យា.)] មរណំ នុ សន្តិកេ;

ឧទាហុ មូឡ្ហោស្មិ ជនិន្ទសេដ្ឋ.

២១០. ន តាយុ [ន ចាយុ (សី. បី. ក.)] ខីណំ មរណញ្ច [មរណំ តេ (សី. បី.)] ទូរេ, ន ចាបិ មូឡ្ហោ នរវីរសេដ្ឋ;

តុយ្ហញ្ច [តវញ្ច (សី. បី.), តវ ច (ក.)] បុញ្ញានិ បរិត្តកានិ, យេសំ វិបាកំ ឥធ វេទយិត្ថោ [វេទយតោ (បី. ក.)].

២១១. វស ទេវានុភាវេន, រាជសេដ្ឋ ទិសម្បតិ;

តាវតិំសេសុ ទេវេសុ, ភុញ្ជ កាមេ អមានុសេ.

២១២. យថា យាចិតកំ យានំ, យថា យាចិតកំ ធនំ;

ឯវំ សម្បទមេវេតំ, យំ បរតោ ទានបច្ចយា.

២១៣. ន ចាហមេតមិច្ឆាមិ, យំ បរតោ ទានបច្ចយា;

សយំកតានិ បុញ្ញានិ, តំ មេ អាវេណិកំ [អាវេណិយំ (សី. ស្យា. បី.), អាវេនិកំ (ក.)] ធនំ.

២១៤. សោហំ គន្ត្វា មនុស្សេសុ, កាហាមិ កុសលំ ពហុំ;

ទានេន សមចរិយាយ, សំយមេន ទមេន ច;

យំ កត្វា សុខិតោ ហោតិ, ន ច បច្ឆានុតប្បតិ.

២១៥. ឥមានិ តានិ ខេត្តានិ, ឥមំ និក្ខំ សុកុណ្ឌលំ;

ឥមា តា ហរិតានូបា, ឥមា នជ្ជោ សវន្តិយោ.

២១៦. ឥមា តា បោក្ខរណី រម្មា, ចក្កវាកបកូជិតា [ចក្កវាកូបកូជិតា (សី. បី.)];

មន្ទាលកេហិ សញ្ឆន្នា, បទុមុប្បលកេហិ ច;

យស្សិមានិ មមាយិំសុ, កិំ នុ តេ ទិសតំ គតា.

២១៧. តានីធ ខេត្តានិ សោ ភូមិភាគោ, តេយេវ អារាមវនុបចារា [តេ អារាមា តេ វន’មេ បចារា (សី. បី.), តេ យេវ អារាមវនានិ សញ្ចរា (ក.)];

តមេវ មយ្ហំ ជនតំ អបស្សតោ, សុញ្ញំវ មេ នារទ ខាយតេ ទិសា.

២១៨. ទិដ្ឋា មយា វិមានានិ, ឱភាសេន្តា ចតុទ្ទិសា;

សម្មុខា ទេវរាជស្ស, តិទសានញ្ច សម្មុខា.

២១៩. វុត្ថំ មេ ភវនំ ទិព្យំ [ទិព្ពំ (សី. បី.)], ភុត្តា កាមា អមានុសា;

តាវតិំសេសុ ទេវេសុ, សព្ពកាមសមិទ្ធិសុ.

២២០. សោហំ ឯតាទិសំ ហិត្វា, បុញ្ញាយម្ហិ ឥធាគតោ;

ធម្មមេវ ចរិស្សាមិ, នាហំ រជ្ជេន អត្ថិកោ.

២២១. អទណ្ឌាវចរំ មគ្គំ, សម្មាសម្ពុទ្ធទេសិតំ;

តំ មគ្គំ បដិបជ្ជិស្សំ, យេន គច្ឆន្តិ សុព្ពតាតិ.

សាធិនជាតកំ [សាធិនរាជជាតកំ (ស្យា.)] ឯកាទសមំ.