៤៩៣. មហាវាណិជជាតកំ (១០)

១៨០. វាណិជា សមិតិំ កត្វា, នានារដ្ឋតោ អាគតា;

ធនាហរា បក្កមិំសុ, ឯកំ កត្វាន គាមណិំ.

១៨១. តេ តំ កន្តារមាគម្ម, អប្បភក្ខំ អនោទកំ;

មហានិគ្រោធមទ្ទក្ខុំ, សីតច្ឆាយំ មនោរមំ.

១៨២. តេ ច តត្ថ និសីទិត្វា, តស្ស រុក្ខស្ស ឆាយយា [ឆាទិយា (សី. ស្យា. បី.)];

វាណិជា សមចិន្តេសុំ, ពាលា មោហេន បារុតា.

១៨៣. អល្លាយតេ [អទ្ទាយតេ (សី. បី.)] អយំ រុក្ខោ, អបិ វារីវ [វារិ ច (សី. បី.)] សន្ទតិ;

ឥង្ឃស្ស បុរិមំ សាខំ, មយំ ឆិន្ទាម វាណិជា.

១៨៤. សា ច ឆិន្នាវ បគ្ឃរិ, អច្ឆំ វារិំ អនាវិលំ;

តេ តត្ថ ន្ហត្វា បិវិត្វា, យាវតិច្ឆិំសុ វាណិជា.

១៨៥. ទុតិយំ សមចិន្តេសុំ, ពាលា មោហេន បារុតា;

ឥង្ឃស្ស ទក្ខិណំ សាខំ, មយំ ឆិន្ទាម វាណិជា.

១៨៦. សា ច ឆិន្នាវ បគ្ឃរិ, សាលិមំសោទនំ ពហុំ;

អប្បោទវណ្ណេ កុម្មាសេ, សិង្គិំ វិទលសូបិយោ [សិង្គិំ ពិទលសូបិយោ (សី. បី.), សិង្គីវេរំ លសូបិយោ (ក.) សិង្គីន្តិ សិង្គីវេរាទិកំ ឧត្តរិភង្គំ; វិទលសូបិយោតិ មុគ្គសូបាទយោ (អដ្ឋ.) វិទលំ កលាយាទិម្ហិ វត្តតីតិ សក្កតាភិធានេ].

១៨៧. តេ តត្ថ ភុត្វា ខាទិត្វា [ភុត្វា ច បិវិត្វា ច (បី.)], យាវតិច្ឆិំសុ វាណិជា;

តតិយំ សមចិន្តេសុំ, ពាលា មោហេន បារុតា;

ឥង្ឃស្ស បច្ឆិមំ សាខំ, មយំ ឆិន្ទាម វាណិជា.

១៨៨. សា ច ឆិន្នាវ បគ្ឃរិ, នារិយោ សមលង្កតា;

វិចិត្រវត្ថាភរណា, អាមុត្តមណិកុណ្ឌលា.

១៨៩. អបិ សុ វាណិជា ឯកា, នារិយោ បណ្ណវីសតិ;

សមន្តា បរិវារិំសុ [បរិករិំសុ (សី. ស្យា. បី.)], តស្ស រុក្ខស្ស ឆាយយា [ឆាទិយា (សី. ស្យា. បី.)].

១៩០. តេ តាហិ បរិចារេត្វា [បរិវារេត្វា (សី. ស្យា. បី.)], យាវតិច្ឆិំសុ វាណិជា;

ចតុត្ថំ សមចិន្តេសុំ, ពាលា មោហេន បារុតា;

ឥង្ឃស្ស ឧត្តរំ សាខំ, មយំ ឆិន្ទាម វាណិជា.

១៩១. សា ច ឆិន្នាវ បគ្ឃរិ, មុត្តា វេឡុរិយា ពហូ;

រជតំ ជាតរូបញ្ច, កុត្តិយោ បដិយានិ ច.

១៩២. កាសិកានិ ច វត្ថានិ, ឧទ្ទិយានិ ច កម្ពលា [ឧទ្ទិយានេ ច កម្ពលេ (សី. បី.)];

តេ តត្ថ ភារេ ពន្ធិត្វា, យាវតិច្ឆិំសុ វាណិជា.

១៩៣. បញ្ចមំ សមចិន្តេសុំ, ពាលា មោហេន បារុតា;

ឥង្ឃស្ស មូលេ [មូលំ (សី. បី. ក.)] ឆិន្ទាម, អបិ ភិយ្យោ លភាមសេ.

១៩៤. អថុដ្ឋហិ សត្ថវាហោ, យាចមានោ កតញ្ជលី;

និគ្រោធោ កិំ បរជ្ឈតិ [អបរជ្ឈថ (សី.), អបរជ្ឈតិ (ស្យា. បី.)], វាណិជា ភទ្ទមត្ថុ តេ.

១៩៥. វារិទា បុរិមា សាខា, អន្នបានញ្ច ទក្ខិណា;

នារិទា បច្ឆិមា សាខា, សព្ពកាមេ ច ឧត្តរា;

និគ្រោធោ កិំ បរជ្ឈតិ, វាណិជា ភទ្ទមត្ថុ តេ.

១៩៦. យស្ស រុក្ខស្ស ឆាយាយ, និសីទេយ្យ សយេយ្យ វា;

ន តស្ស សាខំ ភញ្ជេយ្យ, មិត្តទុព្ភោ ហិ បាបកោ.

១៩៧. តេ ច តស្សានាទិយិត្វា [តស្ស អនាទិត្វា (សី. ស្យា.)], ឯកស្ស វចនំ ពហូ;

និសិតាហិ កុឋារីហិ [កុធារីហិ (ក.)], មូលតោ នំ ឧបក្កមុំ.

១៩៨. តតោ នាគា និក្ខមិំសុ, សន្នទ្ធា បណ្ណវីសតិ;

ធនុគ្គហានំ តិសតា, ឆសហស្សា ច វម្មិនោ.

១៩៩. ឯតេ ហនថ ពន្ធថ, មា វោ មុញ្ចិត្ថ [មុច្ចិត្ថ (បី.)] ជីវិតំ;

ឋបេត្វា សត្ថវាហំវ, សព្ពេ ភស្មំ [ភស្មី (សី.)] ករោថ នេ.

២០០. តស្មា ហិ បណ្ឌិតោ បោសោ, សម្បស្សំ អត្ថមត្តនោ;

លោភស្ស ន វសំ គច្ឆេ, ហនេយ្យារិសកំ [ហនេយ្យ ទិសតំ (សី.), ហនេយ្យ ទិសកំ (ស្យា.)] មនំ.

២០១. ឯវ [ឯត (សី. បី.)] មាទីនវំ ញត្វា, តណ្ហា ទុក្ខស្ស សម្ភវំ;

វីតតណ្ហោ អនាទានោ, សតោ ភិក្ខុ បរិព្ពជេតិ.

មហាវាណិជជាតកំ ទសមំ.