៤៩២. តច្ឆសូករជាតកំ (៩)

១៦០. យទេសមានា វិចរិម្ហ, បព្ពតានិ វនានិ ច;

អន្វេសំ វិចរិំ [វិបុលេ (ស្យា. ក.)] ញាតី, តេមេ អធិគតា មយា.

១៦១. ពហុញ្ចិទំ មូលផលំ, ភក្ខោ ចាយំ អនប្បកោ;

រម្មា ចិមា គិរីនជ្ជោ [គិរិនទិយោ (សី. បី.)], ផាសុវាសោ ភវិស្សតិ.

១៦២. ឥធេវាហំ វសិស្សាមិ, សហ សព្ពេហិ ញាតិភិ;

អប្បោស្សុក្កោ និរាសង្កី, អសោកោ អកុតោភយោ.

១៦៣. អញ្ញម្បិ [អញ្ញំ ហិ (សី. បី.)] លេណំ បរិយេស, សត្តុ នោ ឥធ វិជ្ជតិ;

សោ តច្ឆ សូករេ ហន្តិ, ឥធាគន្ត្វា វរំ វរំ.

១៦៤. កោ នុម្ហាកំ [កោ នម្ហាកំ (សី. បី.)] ឥធ សត្តុ, កោ ញាតី សុសមាគតេ;

ទុប្បធំសេ [អប្បធំសេ (សី. បី.)] បធំសេតិ, តំ មេ អក្ខាថ បុច្ឆិតា.

១៦៥. ឧទ្ធគ្គរាជី មិគរាជា, ពលី ទាឋាវុធោ មិគោ;

សោ តច្ឆ សូករេ ហន្តិ, ឥធាគន្ត្វា វរំ វរំ.

១៦៦. ន នោ ទាឋា ន វិជ្ជន្តិ [នុ វិជ្ជន្តិ (ក.)], ពលំ កាយេ សមោហិតំ;

សព្ពេ សមគ្គា ហុត្វាន, វសំ កាហាម ឯកកំ.

១៦៧. ហទយង្គមំ កណ្ណសុខំ, វាចំ ភាសសិ តច្ឆក;

យោបិ យុទ្ធេ បលាយេយ្យ, តម្បិ បច្ឆា ហនាមសេ.

១៦៨. បាណាតិបាតា វិរតោ នុ អជ្ជ, អភយំ នុ តេ សព្ពភូតេសុ ទិន្នំ;

ទាឋា នុ តេ មិគវធាយ [មិគ វិរិយំ (សី. ស្យា. បី.)] ន សន្តិ, យោ សង្ឃបត្តោ កបណោវ ឈាយសិ.

១៦៩. ន មេ ទាឋា ន វិជ្ជន្តិ, ពលំ កាយេ សមោហិតំ;

ញាតី ច ទិស្វាន សាមគ្គី ឯកតោ, តស្មា ច ឈាយាមិ វនម្ហិ ឯកកោ.

១៧០. ឥមស្សុទំ យន្តិ ទិសោទិសំ បុរេ, ភយដ្ដិតា លេណគវេសិនោ បុថុ;

តេ ទានិ សង្គម្ម វសន្តិ ឯកតោ, យត្ថដ្ឋិតា ទុប្បសហជ្ជ តេ មយា.

១៧១. បរិណាយកសម្បន្នា, សហិតា ឯកវាទិនោ;

តេ មំ សមគ្គា ហិំសេយ្យុំ, តស្មា នេសំ ន បត្ថយេ [អបត្ថវេ (បី.)].

១៧២. ឯកោវ ឥន្ទោ អសុរេ ជិនាតិ, ឯកោវ សេនោ ហន្តិ ទិជេ បសយ្ហ;

ឯកោវ ព្យគ្ឃោ មិគសង្ឃបត្តោ, វរំ វរំ ហន្តិ ពលញ្ហិ តាទិសំ.

១៧៣. ន ហេវ ឥន្ទោ ន សេនោ, នបិ ព្យគ្ឃោ មិគាធិបោ;

សមគ្គេ សហិតេ ញាតី, ន ព្យគ្ឃេ [ព្យគ្ឃេ ច (សី. បី.), ព្យគ្ឃោ ន (ស្យា.)] កុរុតេ វសេ.

១៧៤. កុម្ភីលកា សកុណកា, សង្ឃិនោ គណចារិនោ;

សម្មោទមានា ឯកជ្ឈំ, ឧប្បតន្តិ ឌយន្តិ ច.

១៧៥. តេសញ្ច ឌយមានានំ, ឯកេត្ថ អបសក្កតិ [អបវត្តតិ (សី. បី.)];

តញ្ច សេនោ និតាឡេតិ, វេយ្យគ្ឃិយេវ សា គតិ.

១៧៦. ឧស្សាហិតោ ជដិលេន, លុទ្ទេនាមិសចក្ខុនា;

ទាឋី ទាឋីសុ បក្ខន្ទិ, មញ្ញមានោ យថា បុរេ.

១៧៧. សាធុ សម្ពហុលា ញាតី, អបិ រុក្ខា អរញ្ញជា;

សូករេហិ សមគ្គេហិ, ព្យគ្ឃោ ឯកាយនេ ហតោ.

១៧៨. ព្រាហ្មណញ្ចេវ ព្យគ្ឃញ្ច, ឧភោ ហន្ត្វាន សូករា.

អានន្ទិនោ បមុទិតា, មហានាទំ បនាទិសុំ.

១៧៩. តេ សុ ឧទុម្ពរមូលស្មិំ, សូករា សុសមាគតា;

តច្ឆកំ អភិសិញ្ចិំសុ, ‘‘ត្វំ នោ រាជាសិ ឥស្សរោ’’តិ.

តច្ឆសូករជាតកំ នវមំ.