៤៩១. មហាមោរជាតកំ (៨)

១៤៣. សចេ ហិ ត្យាហំ ធនហេតុ គាហិតោ, មា មំ វធី ជីវគាហំ គហេត្វា;

រញ្ញោ ច [រញ្ញោវ (សី. បី.)] មំ សម្ម ឧបន្តិកំ [ឧបន្តិ (សី. ស្យា. បី.)] នេហិ, មញ្ញេ ធនំ លច្ឆសិនប្បរូបំ.

១៤៤. ន មេ អយំ តុយ្ហ វធាយ អជ្ជ, សមាហិតោ ចាបធុរេ [ចាបវរេ (សី. បី.), ចាបវរោ (ស្យា.)] ខុរប្បោ;

បាសញ្ច ត្យាហំ អធិបាតយិស្សំ, យថាសុខំ គច្ឆតុ មោររាជា.

១៤៥. យំ សត្ត វស្សានិ មមានុពន្ធិ, រត្តិន្ទិវំ ខុប្បិបាសំ សហន្តោ;

អថ កិស្ស មំ បាសវសូបនីតំ, បមុត្តវេ ឥច្ឆសិ ពន្ធនស្មា.

១៤៦. បាណាតិបាតា វិរតោ នុសជ្ជ, អភយំ នុ តេ សព្ពភូតេសុ ទិន្នំ;

យំ មំ តុវំ បាសវសូបនីតំ, បមុត្តវេ ឥច្ឆសិ ពន្ធនស្មា.

១៤៧. បាណាតិបាតា វិរតស្ស ព្រូហិ, អភយញ្ច យោ សព្ពភូតេសុ ទេតិ;

បុច្ឆាមិ តំ មោររាជេតមត្ថំ, ឥតោ ចុតោ កិំ លភតេ សុខំ សោ.

១៤៨. បាណាតិបាតា វិរតស្ស ព្រូមិ, អភយញ្ច យោ សព្ពភូតេសុ ទេតិ;

ទិដ្ឋេវ ធម្មេ លភតេ បសំសំ, សគ្គញ្ច សោ យាតិ សរីរភេទា.

១៤៩. ន សន្តិ ទេវា ឥតិ អាហុ [ឥច្ចាហុ (សី. បី.)] ឯកេ, ឥធេវ ជីវោ វិភវំ ឧបេតិ;

តថា ផលំ សុកតទុក្កដានំ, ទត្តុបញ្ញត្តញ្ច វទន្តិ ទានំ;

តេសំ វចោ អរហតំ សទ្ទហានោ, តស្មា អហំ សកុណេ ពាធយាមិ.

១៥០. ចន្ទោ ច សុរិយោ ច ឧភោ សុទស្សនា, គច្ឆន្តិ ឱភាសយមន្តលិក្ខេ;

ឥមស្ស លោកស្ស បរស្ស វា តេ, កថំ នុ តេ អាហុ មនុស្សលោកេ.

១៥១. ចន្ទោ ច សុរិយោ ច ឧភោ សុទស្សនា, គច្ឆន្តិ ឱភាសយមន្តលិក្ខេ;

បរស្ស លោកស្ស ន តេ ឥមស្ស, ទេវាតិ តេ អាហុ មនុស្សលោកេ.

១៥២. ឯត្ថេវ តេ នីហតា ហីនវាទា, អហេតុកា យេ ន វទន្តិ កម្មំ;

តថា ផលំ សុកតទុក្កដានំ, ទត្តុបញ្ញត្តំ យេ ច វទន្តិ ទានំ.

១៥៣. អទ្ធា ហិ សច្ចំ វចនំ តវេទំ [តវេតំ (សី. ស្យា. បី.)], កថញ្ហិ ទានំ អផលំ ភវេយ្យ [វទេយ្យ (សី. បី.)];

តថា ផលំ សុកតទុក្កដានំ, ទត្តុបញ្ញត្តញ្ច កថំ ភវេយ្យ.

១៥៤. កថំករោ កិន្តិករោ កិមាចរំ, កិំ សេវមានោ កេន តបោគុណេន;

អក្ខាហិ [អក្ខាហិ តំ ទានិ (ក.)] មេ មោររាជេតមត្ថំ, យថា អហំ នោ និរយំ បតេយ្យំ.

១៥៥. យេ កេចិ អត្ថិ សមណា បថព្យា, កាសាយវត្ថា អនគារិយា តេ;

បាតោវ បិណ្ឌាយ ចរន្តិ កាលេ, វិកាលចរិយា វិរតា ហិ សន្តោ.

១៥៦. តេ តត្ថ កាលេនុបសង្កមិត្វា, បុច្ឆាហិ យំ តេ មនសោ បិយំ សិយា;

តេ តេ បវក្ខន្តិ យថាបជានំ, ឥមស្ស លោកស្ស បរស្ស ចត្ថំ.

១៥៧. តចំវ ជិណ្ណំ ឧរគោ បុរាណំ, បណ្ឌូបលាសំ ហរិតោ ទុមោវ;

ឯសប្បហីនោ មម លុទ្ទភាវោ, ជហាមហំ លុទ្ទកភាវមជ្ជ.

១៥៨. យេ ចាបិ មេ សកុណា អត្ថិ ពទ្ធា, សតានិនេកានិ និវេសនស្មិំ;

តេសម្បហំ [តេសំ អហំ (ស្យា. ក.)] ជីវិតមជ្ជ ទម្មិ, មោក្ខញ្ច តេ បត្តា [បត្តោ (សី.), អច្ឆ (ស្យា.)] សកំ និកេតំ.

១៥៩. លុទ្ទោ ចរី បាសហត្ថោ អរញ្ញេ, ពាធេតុ មោរាធិបតិំ យសស្សិំ;

ពន្ធិត្វា [ពន្ធិត្វ (សី. បី.)] មោរាធិបតិំ យសស្សិំ, ទុក្ខា ស បមុច្ចិ [ទុក្ខា បមុច្ចិ (សី.), ទុក្ខា បមុញ្ចិ (ស្យា. បី.)] យថាហំ បមុត្តោតិ.

មហាមោរជាតកំ អដ្ឋមំ.