៤៩០. បញ្ចុបោសថិកជាតកំ (៧)

១២៧. អប្បោស្សុក្កោ ទានិ តុវំ កបោត, វិហង្គម ន តវ ភោជនត្ថោ;

ខុទំ [ខុទ្ទំ (ស្យា. ក.), ខុធំ (សក្កត-បាកតានុរូបំ)] បិបាសំ អធិវាសយន្តោ, កស្មា ភវំបោសថិកោ កបោត [កបោតោ (សី. បី.)].

១២៨. អហំ បុរេ គិទ្ធិគតោ កបោតិយា, អស្មិំ បទេសស្មិមុភោ រមាម;

អថគ្គហី សាកុណិកោ កបោតិំ, អកាមកោ តាយ វិនា អហោសិំ.

១២៩. នានាភវា វិប្បយោគេន តស្សា, មនោមយំ វេទន វេទយាមិ [វេទនំ វេទិយាមិ (សី. បី.)];

តស្មា អហំបោសថំ បាលយាមិ, រាគោ មមំ មា បុនរាគមាសិ.

១៣០. អនុជ្ជុគាមី ឧរគា ទុជិវ្ហ [ឧរគ ទ្វិជិវ្ហ (សី.)], ទាឋាវុធោ ឃោរវិសោសិ សប្ប;

ខុទំ បិបាសំ អធិវាសយន្តោ, កស្មា ភវំបោសថិកោ នុ ទីឃ [ទីឃោ (សី. បី.)].

១៣១. ឧសភោ អហូ ពលវា គាមិកស្ស, ចលក្កកូ វណ្ណពលូបបន្នោ;

សោ មំ អក្កមិ តំ កុបិតោ អឌំសិ, ទុក្ខាភិតុណ្ណោ មរណំ ឧបាគា [ឧបាគមិ (សី. បី.)].

១៣២. តតោ ជនា និក្ខមិត្វាន គាមា, កន្ទិត្វា រោទិត្វា [កន្ទិត្វ រោទិត្វ (សី.)] អបក្កមិំសុ;

តស្មា អហំបោសថំ បាលយាមិ, កោធោ មមំ មា បុនរាគមាសិ.

១៣៣. មតាន មំសានិ ពហូ សុសានេ, មនុញ្ញរូបំ តវ ភោជនេ តំ;

ខុទំ បិបាសំ អធិវាសយន្តោ, កស្មា ភវំបោសថិកោ សិង្គាល [សិគាលោ (សី. បី.)].

១៣៤. បវិសិ [បវិស្សំ (សី. បី.), បវិស្ស (ស្យា.)] កុច្ឆិំ មហតោ គជស្ស, កុណបេ រតោ ហត្ថិមំសេសុ គិទ្ធោ [ហត្ថិមំសេ បគិទ្ធោ (សី. បី.)];

ឧណ្ហោ ច វាតោ តិខិណា ច រស្មិយោ, តេ សោសយុំ តស្ស ករីសមគ្គំ.

១៣៥. កិសោ ច បណ្ឌូ ច អហំ ភទន្តេ, ន មេ អហូ និក្ខមនាយ មគ្គោ;

មហា ច មេឃោ សហសា បវស្សិ, សោ តេមយី តស្ស ករីសមគ្គំ.

១៣៦. តតោ អហំ និក្ខមិសំ ភទន្តេ, ចន្ទោ យថា រាហុមុខា បមុត្តោ;

តស្មា អហំបោសថំ បាលយាមិ, លោភោ មមំ មា បុនរាគមាសិ.

១៣៧. វម្មីកថូបស្មិំ កិបិល្លិកានិ, និប្បោថយន្តោ តុវំ បុរេ ចរាសិ;

ខុទំ បិបាសំ អធិវាសយន្តោ, កស្មា ភវំបោសថិកោ នុ អច្ឆ [អច្ឆោ (សី. បី.)].

១៣៨. សកំ និកេតំ អតិហីឡយានោ [អតិហេឡយានោ (ស្យា. ក.)], អត្រិច្ឆតា [អត្រិច្ឆតាយ (សី. ស្យា. បី.)] មល្លគាមំ [មលតំ (សី. បី.), មល្លយតំ (ក.)] អគច្ឆិំ;

តតោ ជនា និក្ខមិត្វាន គាមា, កោទណ្ឌកេន បរិបោថយិំសុ មំ.

១៣៩. សោ ភិន្នសីសោ រុហិរមក្ខិតង្គោ, បច្ចាគមាសិំ សកំ [ស សកំ (ស្យា. ក.),’ថ សកំ (?)] និកេតំ;

តស្មា អហំបោសថំ បាលយាមិ, អត្រិច្ឆតា មា បុនរាគមាសិ.

១៤០. យំ នោ អបុច្ឆិត្ថ តុវំ ភទន្តេ, សព្ពេវ ព្យាករិម្ហ យថា បជានំ;

មយម្បិ បុច្ឆាម តុវំ ភទន្តេ, កស្មា ភវំបោសថិកោ នុ ព្រហ្មេ.

១៤១. អនូបលិត្តោ មម អស្សមម្ហិ, បច្ចេកពុទ្ធោ មុហុត្តំ និសីទិ;

សោ មំ អវេទី គតិមាគតិញ្ច, នាមញ្ច គោត្តំ ចរណញ្ច សព្ពំ.

១៤២. ឯវម្បហំ វន្ទិ ន [ឯវម្បហំ នគ្គហេ (សី. បី.)] តស្ស បាទេ, ន ចាបិ នំ មានគតេន បុច្ឆិំ;

តស្មា អហំបោសថំ បាលយាមិ, មានោ មមំ មា បុនរាគមាសីតិ.

បញ្ចុបោសថិកជាតកំ សត្តមំ.