៤៨៩. សុរុចិជាតកំ (៦)

១០២. មហេសី សុរុចិនោ [រុចិនោ (សី. ស្យា. បី.)] ភរិយា, អានីតា បឋមំ អហំ;

ទស វស្សសហស្សានិ, យំ មំ សុរុចិមានយិ.

១០៣. សាហំ ព្រាហ្មណ រាជានំ, វេទេហំ មិថិលគ្គហំ;

នាភិជានាមិ កាយេន, វាចាយ ឧទ ចេតសា;

សុរុចិំ អតិមញ្ញិត្ថ [អតិមញ្ញិត្ថោ (សី. បី.), អតិមញ្ញិតា (?)], អាវិ [អាវិំ (សី. បី.)] វា យទិ វា រហោ.

១០៤. ឯតេន សច្ចវជ្ជេន, បុត្តោ ឧប្បជ្ជតំ ឥសេ;

មុសា មេ ភណមានាយ, មុទ្ធា ផលតុ សត្តធា.

១០៥. ភត្តុ មម សស្សុ មាតា, បិតា ចាបិ ច សស្សុរោ;

តេ មំ ព្រហ្មេ វិនេតារោ, យាវ អដ្ឋំសុ ជីវិតំ.

១០៦. សាហំ អហិំសារតិនី, កាមសា [កាមសោ (សី.)] ធម្មចារិនី [ធម្មចារិណី (សី.)];

សក្កច្ចំ តេ ឧបដ្ឋាសិំ, រត្តិន្ទិវមតន្ទិតា.

១០៧. ឯតេន សច្ចវជ្ជេន, បុត្តោ ឧប្បជ្ជតំ ឥសេ;

មុសា មេ ភណមានាយ, មុទ្ធា ផលតុ សត្តធា.

១០៨. សោឡសិត្ថិសហស្សានិ, សហភរិយានិ ព្រាហ្មណ;

តាសុ ឥស្សា វា កោធោ វា, នាហុ មយ្ហំ កុទាចនំ.

១០៩. ហិតេន តាសំ នន្ទាមិ, ន ច មេ កាចិ អប្បិយា;

អត្តានំវានុកម្បាមិ, សទា សព្ពា សបត្តិយោ.

១១០. ឯតេន សច្ចវជ្ជេន, បុត្តោ ឧប្បជ្ជតំ ឥសេ;

មុសា មេ ភណមានាយ, មុទ្ធា ផលតុ សត្តធា.

១១១. ទាសេ កម្មករេ បេស្សេ [បោសេ (ស្យា. ក.)], យេ ចញ្ញេ អនុជីវិនោ;

បេសេមិ [បោសេមិ (សី. ស្យា. បី.)] សហធម្មេន, សទា បមុទិតិន្ទ្រិយា.

១១២. ឯតេន សច្ចវជ្ជេន, បុត្តោ ឧប្បជ្ជតំ ឥសេ;

មុសា មេ ភណមានាយ, មុទ្ធា ផលតុ សត្តធា.

១១៣. សមណេ ព្រាហ្មណេ ចាបិ, អញ្ញេ ចាបិ វនិព្ពកេ;

តប្បេមិ អន្នបានេន, សទា បយតបាណិនី.

១១៤. ឯតេន សច្ចវជ្ជេន, បុត្តោ ឧប្បជ្ជតំ ឥសេ;

មុសា មេ ភណមានាយ, មុទ្ធា ផលតុ សត្តធា.

១១៥. ចាតុទ្ទសិំ បញ្ចទ្ទសិំ [បន្នរសិំ (សី. បី.)], យា ច បក្ខស្ស អដ្ឋមី [អដ្ឋមិំ (សី. បី.)];

បាដិហារិយបក្ខញ្ច, អដ្ឋង្គសុសមាគតំ [អដ្ឋង្គសុសមាហិតំ (សព្ពត្ថ) វិ. វ. ១២៩ បាឡិយា អដ្ឋកថា បស្សិតព្ពា];

ឧបោសថំ ឧបវសាមិ [ឧបវសិំ (ក.)], សទា សីលេសុ សំវុតា.

១១៦. ឯតេន សច្ចវជ្ជេន, បុត្តោ ឧប្បជ្ជតំ ឥសេ;

មុសា មេ ភណមានាយ, មុទ្ធា ផលតុ សត្តធា.

១១៧. សព្ពេវ តេ ធម្មគុណា, រាជបុត្តិ យសស្សិនិ;

សំវិជ្ជន្តិ តយិ ភទ្ទេ, យេ ត្វំ កិត្តេសិ អត្តនិ.

១១៨. ខត្តិយោ ជាតិសម្បន្នោ, អភិជាតោ យសស្សិមា;

ធម្មរាជា វិទេហានំ, បុត្តោ ឧប្បជ្ជតេ តវ [តវំ (សី. បី.)].

១១៩. ទុម្មី [រុម្មី (សី. បី.)] រជោជល្លធរោ, អឃេ វេហាយសំ ឋិតោ;

មនុញ្ញំ ភាសសេ វាចំ, យំ មយ្ហំ ហទយង្គមំ.

១២០. ទេវតានុសិ សគ្គម្ហា, ឥសិ វាសិ [ចាបិ (ក.)] មហិទ្ធិកោ;

កោ វាសិ ត្វំ អនុប្បត្តោ, អត្តានំ មេ បវេទយ.

១២១. យំ ទេវសង្ឃា វន្ទន្តិ, សុធម្មាយំ សមាគតា;

សោហំ សក្កោ សហស្សក្ខោ, អាគតោស្មិ តវន្តិកេ.

១២២. ឥត្ថិយោ [ឥត្ថិយា (បី.)] ជីវលោកស្មិំ, យា ហោតិ [ហោន្តិ (សី. ស្យា.)] សមចារិនី [សមចារិណី (សី.)];

មេធាវិនី សីលវតី, សស្សុទេវា បតិព្ពតា.

១២៣. តាទិសាយ សុមេធាយ, សុចិកម្មាយ នារិយា;

ទេវា ទស្សនមាយន្តិ, មានុសិយា អមានុសា.

១២៤. ត្វញ្ច ភទ្ទេ សុចិណ្ណេន, បុព្ពេ សុចរិតេន ច;

ឥធ រាជកុលេ ជាតា, សព្ពកាមសមិទ្ធិនី.

១២៥. អយញ្ច តេ រាជបុត្តិ, ឧភយត្ថ កដគ្គហោ;

ទេវលោកូបបត្តី ច, កិត្តី ច ឥធ ជីវិតេ.

១២៦. ចិរំ សុមេធេ សុខិនី, ធម្មមត្តនិ បាលយ;

ឯសាហំ តិទិវំ យាមិ, បិយំ មេ តវ ទស្សនន្តិ.

សុរុចិជាតកំ ឆដ្ឋំ.