៤៨៨. ភិសជាតកំ (៥)

៧៨. អស្សំ គវំ រជតំ ជាតរូបំ, ភរិយញ្ច សោ ឥធ លភតំ មនាបំ;

បុត្តេហិ ទារេហិ សមង្គិ ហោតុ, ភិសានិ តេ ព្រាហ្មណ យោ អហាសិ.

៧៩. មាលញ្ច សោ កាសិកចន្ទនញ្ច, ធារេតុ បុត្តស្ស ពហូ ភវន្តុ;

កាមេសុ តិព្ពំ កុរុតំ អបេក្ខំ, ភិសានិ តេ ព្រាហ្មណ យោ អហាសិ.

៨០. បហូតធញ្ញោ កសិមា យសស្សី, បុត្តេ គិហី ធនិមា សព្ពកាមេ;

វយំ អបស្សំ ឃរមាវសាតុ, ភិសានិ តេ ព្រាហ្មណ យោ អហាសិ.

៨១. សោ ខត្តិយោ ហោតុ បសយ្ហការី, រាជាភិរាជា [រាជាធិរាជា (ស្យា. ក.)] ពលវា យសស្សី;

ស ចាតុរន្តំ មហិមាវសាតុ, ភិសានិ តេ ព្រាហ្មណ យោ អហាសិ.

៨២. សោ ព្រាហ្មណោ ហោតុ អវីតរាគោ, មុហុត្តនក្ខត្តបថេសុ យុត្តោ;

បូជេតុ នំ រដ្ឋបតី យសស្សី, ភិសានិ តេ ព្រាហ្មណ យោ អហាសិ.

៨៣. អជ្ឈាយកំ សព្ពសមន្តវេទំ [សព្ពសមត្តវេទំ (សី.), សព្ពសមត្តវេទនំ (បី.)], តបស្សីនំ មញ្ញតុ សព្ពលោកោ;

បូជេន្តុ នំ ជានបទា សមេច្ច, ភិសានិ តេ ព្រាហ្មណ យោ អហាសិ.

៨៤. ចតុស្សទំ គាមវរំ សមិទ្ធំ, ទិន្នញ្ហិ សោ ភុញ្ជតុ វាសវេន;

អវីតរាគោ មរណំ ឧបេតុ, ភិសានិ តេ ព្រាហ្មណ យោ អហាសិ.

៨៥. សោ គាមណី ហោតុ សហាយមជ្ឈេ, នច្ចេហិ គីតេហិ បមោទមានោ;

សោ រាជតោ ព្យសន មាលត្ថ [មា រាជតោ វ្យសន’មលត្ថ (សី. ស្យា. បី.)] កិញ្ចិ, ភិសានិ តេ ព្រាហ្មណ យោ អហាសិ.

៨៦. យំ ឯករាជា បថវិំ វិជេត្វា, ឥត្ថីសហស្សាន [ឥត្ថីសហស្សស្ស (សី. បី.)] ឋបេតុ អគ្គំ;

សីមន្តិនីនំ បវរា ភវាតុ, ភិសានិ តេ ព្រាហ្មណ យា អហាសិ.

៨៧. ឥសីនញ្ហិ សា សព្ពសមាគតានំ, ភុញ្ជេយ្យ សាទុំ អវិកម្បមានា;

ចរាតុ លាភេន វិកត្ថមានា, ភិសានិ តេ ព្រាហ្មណ យា អហាសិ.

៨៨. អាវាសិកោ ហោតុ មហាវិហារេ, នវកម្មិកោ ហោតុ គជង្គលាយំ [កជង្គលាយំ (សី. ស្យា. បី.)];

អាលោកសន្ធិំ ទិវសំ [ទិវសា (សី. ស្យា. បី.)] ករោតុ, ភិសានិ តេ ព្រាហ្មណ យោ អហាសិ.

៨៩. សោ ពជ្ឈតូ បាសសតេហិ ឆព្ភិ [ឆម្ហិ (សី. បី.), ឆស្សុ (?)], រម្មា វនា និយ្យតុ រាជធានិំ [រាជឋានិំ (ក.)];

តុត្តេហិ សោ ហញ្ញតុ បាចនេហិ, ភិសានិ តេ ព្រាហ្មណ យោ អហាសិ.

៩០. អលក្កមាលី តិបុកណ្ណវិទ្ធោ, លដ្ឋីហតោ សប្បមុខំ ឧបេតុ;

សកច្ឆពន្ធោ [សក្កច្ចពទ្ធោ (សី. បី.), សំកច្ចពន្ធោ (និយ្យ)] វិសិខំ ចរាតុ, ភិសានិ តេ ព្រាហ្មណ យោ អហាសិ.

៩១. យោ វេ អនដ្ឋំវ [អនដ្ឋំ (សី. ស្យា. បី.)] នដ្ឋន្តិ ចាហ, កាមេវ សោ លភតំ ភុញ្ជតញ្ច [លភតុ ភុញ្ជតុ ច (ស្យា.)];

អគារមជ្ឈេ មរណំ ឧបេតុ, យោ វា ភោន្តោ សង្កតិ កញ្ចិទេវ [កិញ្ចិទេវ (ក.)].

៩២. យទេសមានា វិចរន្តិ លោកេ, ឥដ្ឋញ្ច កន្តញ្ច ពហូនមេតំ;

បិយំ មនុញ្ញំ ចិធ ជីវលោកេ, កស្មា ឥសយោ នប្បសំសន្តិ កាមេ.

៩៣. កាមេសុ វេ ហញ្ញរេ ពជ្ឈរេ ច, កាមេសុ ទុក្ខញ្ច ភយញ្ច ជាតំ;

កាមេសុ ភូតាធិបតី បមត្តា, បាបានិ កម្មានិ ករោន្តិ មោហា.

៩៤. តេ បាបធម្មា បសវេត្វ បាបំ, កាយស្ស ភេទា និរយំ វជន្តិ;

អាទីនវំ កាមគុណេសុ ទិស្វា, តស្មា ឥសយោ នប្បសំសន្តិ កាមេ.

៩៥. វីមំសមានោ ឥសិនោ ភិសានិ, តីរេ គហេត្វាន ថលេ និធេសិំ;

សុទ្ធា អបាបា ឥសយោ វសន្តិ, ឯតានិ តេ ព្រហ្មចារី ភិសានិ.

៩៦. ន តេ នដា នោ បន កីឡនេយ្យា, ន ពន្ធវា នោ បន តេ សហាយា;

កិស្មិំ វុបត្ថម្ភ សហស្សនេត្ត, ឥសីហិ ត្វំ កីឡសិ ទេវរាជ.

៩៧. អាចរិយោ មេសិ បិតា ច មយ្ហំ, ឯសា បតិដ្ឋា ខលិតស្ស ព្រហ្មេ;

ឯកាបរាធំ ខម ភូរិបញ្ញ, ន បណ្ឌិតា កោធពលា ភវន្តិ.

៩៨. សុវាសិតំ ឥសិនំ ឯករត្តំ, យំ វាសវំ ភូតបតិទ្ទសាម;

សព្ពេវ ភោន្តោ សុមនា ភវន្តុ, យំ ព្រាហ្មណោ បច្ចុបាទី ភិសានិ.

៩៩. អហញ្ច សារិបុត្តោ ច, មោគ្គល្លានោ ច កស្សបោ;

អនុរុទ្ធោ បុណ្ណោ អានន្ទោ, តទាសុំ សត្ត ភាតរោ.

១០០. ភគិនី ឧប្បលវណ្ណា ច, ទាសី ខុជ្ជុត្តរា តទា;

ចិត្តោ គហបតិ ទាសោ, យក្ខោ សាតាគិរោ តទា.

១០១. បាលិលេយ្យោ [បារិលេយ្យោ (សី. បី.)] តទា នាគោ, មធុទោ [មធុវា (សី. បី.)] សេដ្ឋវានរោ;

កាឡុទាយី តទា សក្កោ, ឯវំ ធារេថ ជាតកន្តិ.

ភិសជាតកំ បញ្ចមំ.