៤៨៧. ឧទ្ទាលកជាតកំ (៤)

៦២. ខរាជិនា ជដិលា បង្កទន្តា, ទុម្មក្ខរូបា [ទុម្មុធរូបា (សី. បី. ក.)] យេ មន្តំ ជប្បន្តិ [យេមេ ជបន្តិ (សី. បី.), យេ’មេ ជប្បន្តិ មន្តេ (ជា. ១.៦.១០)];

កច្ចិន្នុ តេ មានុសកេ បយោគេ, ឥទំ វិទូ បរិមុត្តា អបាយា.

៦៣. បាបានិ កម្មានិ ករេថ [ករេយ្យ (ស្យា.), កត្វាន (ជា. ១.៦.១១)] រាជ, ពហុស្សុតោ ចេ ន ចរេយ្យ ធម្មំ;

សហស្សវេទោបិ ន តំ បដិច្ច, ទុក្ខា បមុច្ចេ [បមុញ្ចេ (ស្យា.)] ចរណំ អបត្វា.

៦៤. សហស្សវេទោបិ ន តំ បដិច្ច, ទុក្ខា បមុច្ចេ ចរណំ អបត្វា;

មញ្ញាមិ វេទា អផលា ភវន្តិ, សសំយមំ ចរណញ្ញេវ សច្ចំ.

៦៥. ន ហេវ វេទា អផលា ភវន្តិ, សសំយមំ ចរណញ្ញេវ សច្ចំ;

កិត្តិញ្ហិ [កិត្តិញ្ច (ស្យា.)] បប្បោតិ អធិច្ច វេទេ, សន្តិំ បុណាតិ [បុនោតិ (សី. អដ្ឋ.), បុណេតិ (ស្យា. ជា. ១.៦.១៣), បុនេតិ (បី.)] ចរណេន ទន្តោ.

៦៦. ភច្ចា មាតា បិតា ពន្ធូ, យេន ជាតោ សយេវ សោ;

ឧទ្ទាលកោ អហំ ភោតោ [ភោតិ (ក.)], សោត្តិយាកុលវំសកោ [វំសតោ (ក.)].

៦៧. កថំ ភោ ព្រាហ្មណោ ហោតិ, កថំ ភវតិ កេវលី;

កថញ្ច បរិនិព្ពានំ, ធម្មដ្ឋោ កិន្តិ វុច្ចតិ.

៦៨. និរំកត្វា អគ្គិមាទាយ ព្រាហ្មណោ, អាបោ សិញ្ចំ យជំ ឧស្សេតិ យូបំ;

ឯវំករោ ព្រាហ្មណោ ហោតិ ខេមី, ធម្មេ ឋិតំ តេន អមាបយិំសុ.

៦៩. ន សុទ្ធិ សេចនេនត្ថិ, នាបិ កេវលី ព្រាហ្មណោ;

ន ខន្តី នាបិ សោរច្ចំ, នាបិ សោ បរិនិព្ពុតោ.

៧០. កថំ សោ [ភោ (ស្យា. ក.)] ព្រាហ្មណោ ហោតិ, កថំ ភវតិ កេវលី;

កថញ្ច បរិនិព្ពានំ, ធម្មដ្ឋោ កិន្តិ វុច្ចតិ.

៧១. អខេត្តពន្ធូ អមមោ និរាសោ, និល្លោភបាបោ ភវលោភខីណោ;

ឯវំករោ ព្រាហ្មណោ ហោតិ ខេមី, ធម្មេ ឋិតំ តេន អមាបយិំសុ.

៧២. ខត្តិយា ព្រាហ្មណា វេស្សា, សុទ្ទា ចណ្ឌាលបុក្កុសា;

សព្ពេវ សោរតា ទន្តា, សព្ពេវ បរិនិព្ពុតា;

សព្ពេសំ សីតិភូតានំ, អត្ថិ សេយ្យោថ [សេយ្យោវ (សី. បី.)] បាបិយោ.

៧៣. ខត្តិយា ព្រាហ្មណា វេស្សា, សុទ្ទា ចណ្ឌាលបុក្កុសា;

សព្ពេវ សោរតា ទន្តា, សព្ពេវ បរិនិព្ពុតា;

សព្ពេសំ សីតិភូតានំ, នត្ថិ សេយ្យោថ បាបិយោ.

៧៤. ខត្តិយា ព្រាហ្មណា វេស្សា, សុទ្ទា ចណ្ឌាលបុក្កុសា;

សព្ពេវ សោរតា ទន្តា, សព្ពេវ បរិនិព្ពុតា.

៧៥. សព្ពេសំ សីតិភូតានំ, នត្ថិ សេយ្យោថ បាបិយោ;

បនត្ថំ [បសត្ថំ (ស្យា.), បសដ្ឋំ (ក.)] ចរសិ ព្រហ្មញ្ញំ, សោត្តិយាកុលវំសតំ.

៧៦. នានារត្តេហិ វត្ថេហិ, វិមានំ ភវតិ ឆាទិតំ;

ន តេសំ ឆាយា វត្ថានំ, សោ រាគោ អនុបជ្ជថ.

៧៧. ឯវមេវ [ឯវមេវំ (បី.)] មនុស្សេសុ, យទា សុជ្ឈន្តិ មាណវា;

តេ សជាតិំ បមុញ្ចន្តិ [ន តេសំ ជាតិំ បុច្ឆន្តិ (សី. ស្យា. បី.), ន តេសំ ជាតិ សុជ្ឈតិ (ក.)], ធម្មមញ្ញាយ សុព្ពតាតិ.

ឧទ្ទាលកជាតកំ ចតុត្ថំ.