៤៨៦. មហាឧក្កុសជាតកំ (៣)

៤៤. ឧក្កា ចិលាចា [មិលាចា (សី. ស្យា. បី.)] ពន្ធន្តិ ទីបេ [ពន្ធន្តិ លុទ្ទា, ទីបេ (ក.)], បជា មមំ ខាទិតុំ បត្ថយន្តិ;

មិត្តំ សហាយញ្ច វទេហិ សេនក, អាចិក្ខ ញាតិព្យសនំ ទិជានំ.

៤៥. ទិជោ ទិជានំ បវរោសិ បក្ខិម [បក្ខិ (សី. បី.), បក្ខិ ច (ស្យា.)], ឧក្កុសរាជ សរណំ តំ ឧបេម [ឧបេមិ (សី. ស្យា. បី.)];

បជា មមំ ខាទិតុំ បត្ថយន្តិ, លុទ្ទា ចិលាចា [មិលាចា (សី. ស្យា. បី.)] ភវ មេ សុខាយ.

៤៦. មិត្តំ សហាយញ្ច ករោន្តិ បណ្ឌិតា, កាលេ អកាលេ សុខមេសមានា [មាសយានា (បី.)];

ករោមិ តេ សេនក ឯតមត្ថំ, អរិយោ ហិ អរិយស្ស ករោតិ កិច្ចំ.

៤៧. យំ ហោតិ កិច្ចំ អនុកម្បកេន, អរិយស្ស អរិយេន កតំ តយីទំ [តវ យិទំ (សី. បី.)];

អត្តានុរក្ខី ភវ មា អទយ្ហិ [អឌយ្ហ (សី. បី.)], លច្ឆាម បុត្តេ តយិ ជីវមានេ.

៤៨. តវេវ [តមេវ (ស្យា. ក.)] រក្ខាវរណំ ករោន្តោ, សរីរភេទាបិ ន សន្តសាមិ;

ករោន្តិ ហេកេ [ហេតេ (ក. សី. ស្យា. បី.)] សខីនំ សខារោ, បាណំ ចជន្តា [ចជន្តិ (សី. បី.)] សតមេស [សតានេស (បី.)] ធម្មោ.

៤៩. សុទុក្ករំ កម្មមកាសិ [មកា (សី. បី.)], អណ្ឌជាយំ វិហង្គមោ;

អត្ថាយ កុររោ បុត្តេ, អឌ្ឍរត្តេ អនាគតេ.

៥០. ចុតាបិ ហេកេ [ឯកេ (សី. បី.)] ខលិតា សកម្មុនា, មិត្តានុកម្បាយ បតិដ្ឋហន្តិ;

បុត្តា មមដ្ដា គតិមាគតោស្មិ, អត្ថំ ចរេថោ [ចរេថ (សី. ស្យា. បី.)] មម វារិចរ [វារិឆន្ន (សី. បី.)].

៥១. ធនេន ធញ្ញេន ច អត្តនា ច, មិត្តំ សហាយញ្ច ករោន្តិ បណ្ឌិតា;

ករោមិ តេ សេនក ឯតមត្ថំ, អរិយោ ហិ អរិយស្ស ករោតិ កិច្ចំ.

៥២. អប្បោស្សុក្កោ តាត តុវំ និសីទ, បុត្តោ បិតុ ចរតិ អត្ថចរិយំ;

អហំ ចរិស្សាមិ តវេតមត្ថំ, សេនស្ស បុត្តេ បរិតាយមានោ.

៥៣. អទ្ធា ហិ តាត សតមេស ធម្មោ, បុត្តោ បិតុ យំ ចរេ [បិតុនំ ចរេ (ក.), បិតុ យញ្ចរេថ (សី. បី.)] អត្ថចរិយំ;

អប្បេវ មំ ទិស្វាន បវឌ្ឍកាយំ, សេនស្ស បុត្តា ន វិហេឋយេយ្យុំ.

៥៤. បសូ មនុស្សា មិគវីរសេដ្ឋ [មិគវិរិយសេដ្ឋ (សី. បី.)], ភយដ្ដិតា [ភយទ្ទិតា (សី. បី.)] សេដ្ឋមុបព្ពជន្តិ;

បុត្តា មមដ្ដា គតិមាគតោស្មិ, ត្វំ នោសិ រាជា ភវ មេ សុខាយ.

៥៥. ករោមិ តេ សេនក ឯតមត្ថំ, អាយាមិ តេ តំ ទិសតំ វធាយ;

កថញ្ហិ វិញ្ញូ បហុ សម្បជានោ, ន វាយមេ អត្តជនស្ស គុត្តិយា.

៥៦. មិត្តញ្ច កយិរាថ សុហទយញ្ច [សុហទ្ទយញ្ច (សី.), សខាឃរញ្ច (បី.)], អយិរញ្ច កយិរាថ សុខាគមាយ;

និវត្ថកោចោវ [កោជោវ (សី. បី.)] សរេភិហន្ត្វា, មោទាម បុត្តេហិ សមង្គិភូតា.

៥៧. សកមិត្តស្ស កម្មេន, សហាយស្សាបលាយិនោ;

កូជន្តមុបកូជន្តិ, លោមសា ហទយង្គមំ.

៥៨. មិត្តំ សហាយំ អធិគម្ម បណ្ឌិតោ, សោ ភុញ្ជតី បុត្ត បសុំ ធនំ វា;

អហញ្ច បុត្តា ច បតី ច មយ្ហំ, មិត្តានុកម្បាយ សមង្គិភូតា.

៥៩. រាជវតា សូរវតា ច អត្ថោ, សម្បន្នសខិស្ស ភវន្តិ ហេតេ;

សោ មិត្តវា យសវា ឧគ្គតត្តោ, អស្មិំធលោកេ [អស្មិញ្ច លោកេ (សី. ស្យា. បី.)] មោទតិ កាមកាមី.

៦០. ករណីយានិ មិត្តានិ, ទលិទ្ទេនាបិ សេនក;

បស្ស មិត្តានុកម្បាយ, សមគ្គម្ហា សញាតកេ [សញាតកា (?)].

៦១. សូរេន ពលវន្តេន, យោ មិត្តេ [មេត្តេ (សី.), មិត្តំ (ស្យា.)] កុរុតេ ទិជោ;

ឯវំ សោ សុខិតោ ហោតិ, យថាហំ ត្វញ្ច សេនកាតិ.

មហាឧក្កុសជាតកំ តតិយំ.