៤៨៥. ចន្ទកិន្នរីជាតកំ (២)

១៨. ឧបនីយតិទំ មញ្ញេ, ចន្ទេ [លោហិតមទេន មជ្ជាមិ; វិជហាមិ ជីវិតំ បាណា, (សី. បី. អដ្ឋ.)] លោហិតមទ្ទនេ;

អជ្ជ ជហាមិ ជីវិតំ, បាណា [លោហិតមទេន មជ្ជាមិ; វិជហាមិ ជីវិតំ បាណា, (សី. បី. អដ្ឋ.)] មេ ចន្ទេ និរុជ្ឈន្តិ.

១៩. ឱសីទិ [ឱសធិ (សី. ស្យា. បី.), ឱសដ្ឋិ (ក.), ឱសតិ (អភិនវដីកា), ឱសីទតិ (?)] មេ ទុក្ខំ [ទុក្ខំ មេ (សី. បី.)] ហទយំ, មេ ឌយ្ហតេ និតម្មាមិ;

តវ ចន្ទិយា សោចន្តិយា, ន នំ អញ្ញេហិ សោកេហិ.

២០. តិណមិវ វនមិវ មិលាយាមិ [មិលយាមិ (សី.), មិយ្យាមិ (សី. បី. អដ្ឋ.)], នទី អបរិបុណ្ណាវ [អបរិបុណ្ណិយាវ (សី. បី.)] សុស្សាមិ;

តវ ចន្ទិយា សោចន្តិយា, ន នំ អញ្ញេហិ សោកេហិ.

២១. វស្សមិវ សរេ បាទេ [វស្សំវ សរេ បាទេ (សី.), វស្សំវ សរេ បព្ពតបាទេ (បី.)], ឥមានិ អស្សូនិ វត្តរេ មយ្ហំ;

តវ ចន្ទិយា សោចន្តិយា, ន នំ អញ្ញេហិ សោកេហិ.

២២. បាបោ ខោសិ [បាបោសិ ខោ (សី.), បាបោ ខោ (ស្យា. បី.)] រាជបុត្ត, យោ មេ ឥច្ឆិតំ [ឥច្ឆិត (សី. ស្យា. បី.)] បតិំ វរាកិយា;

វិជ្ឈសិ វនមូលស្មិំ, សោយំ វិទ្ធោ ឆមា សេតិ.

២៣. ឥមំ មយ្ហំ ហទយសោកំ, បដិមុញ្ចតុ រាជបុត្ត តវ មាតា;

យោ មយ្ហំ ហទយសោកោ, កិម្បុរិសំ អវេក្ខមានាយ.

២៤. ឥមំ មយ្ហំ ហទយសោកំ, បដិមុញ្ចតុ រាជបុត្ត តវ ជាយា;

យោ មយ្ហំ ហទយសោកោ, កិម្បុរិសំ អវេក្ខមានាយ.

២៥. មា ច បុត្តំ [បុត្តេ (សី. បី.)] មា ច បតិំ, អទ្ទក្ខិ រាជបុត្ត តវ មាតា;

យោ កិម្បុរិសំ អវធិ, អទូសកំ មយ្ហ កាមា ហិ [មយ្ហំ កាមា (ក.)].

២៦. មា ច បុត្តំ មា ច បតិំ, អទ្ទក្ខិ រាជបុត្ត តវ ជាយា;

យោ កិម្បុរិសំ អវធិ, អទូសកំ មយ្ហ កាមា ហិ.

២៧. មា ត្វំ ចន្ទេ រោទិ, មា សោចិ វនតិមិរមត្តក្ខិ;

មម ត្វំ ហេហិសិ ភរិយា, រាជកុលេ បូជិតា នារីភិ [នារី (សី. បី.)].

២៨. អបិ នូនហំ មរិស្សំ, នាហំ [ន ច បនាហំ (សី. បី.)] រាជបុត្ត តវ ហេស្សំ;

យោ កិម្បុរិសំ អវធិ, អទូសកំ មយ្ហ កាមា ហិ.

២៩. អបិ ភីរុកេ អបិ ជីវិតុកាមិកេ, កិម្បុរិសិ គច្ឆ ហិមវន្តំ;

តាលីសតគរភោជនា, អញ្ញេ [តាលិស្សតគរភោជនេ, អរញ្ញេ (សី. បី.)] តំ មិគា រមិស្សន្តិ.

៣០. តេ បព្ពតា តា ច កន្ទរា, [តា ច គិរិគុហាយោ (សី. ស្យា. បី.)] តា ច គិរិគុហាយោ តថេវ តិដ្ឋន្តិ [តា ច គិរិគុហាយោ (សី. ស្យា. បី.)];

តត្ថេវ [តត្ថ (សី. ស្យា. បី.)] តំ អបស្សន្តី, កិម្បុរិស កថំ អហំ កស្សំ.

៣១. តេ បណ្ណសន្ថតា រមណីយា, វាឡមិគេហិ អនុចិណ្ណា;

តត្ថេវ តំ អបស្សន្តី, កិម្បុរិស កថំ អហំ កស្សំ [កាសំ (សី. ស្យា. បី.)].

៣២. តេ បុប្ផសន្ថតា រមណីយា, វាឡមិគេហិ អនុចិណ្ណា;

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៣. អច្ឆា សវន្តិ គិរិវន [គិរិវរ (សី. បី.)] នទិយោ, កុសុមាភិកិណ្ណសោតាយោ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៤. នីលានិ ហិមវតោ បព្ពតស្ស, កូដានិ ទស្សនីយានិ [ទស្សនេយ្យានិ (សី. បី.)];

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៥. បីតានិ ហិមវតោ បព្ពតស្ស, កូដានិ ទស្សនីយានិ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៦. តម្ពានិ ហិមវតោ បព្ពតស្ស, កូដានិ ទស្សនីយានិ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៧. តុង្គានិ ហិមវតោ បព្ពតស្ស, កូដានិ ទស្សនីយានិ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៨. សេតានិ ហិមវតោ បព្ពតស្ស, កូដានិ ទស្សនីយានិ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៣៩. ចិត្រានិ ហិមវតោ បព្ពតស្ស, កូដានិ ទស្សនីយានិ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៤០. យក្ខគណសេវិតេ គន្ធមាទនេ, ឱសធេភិ សញ្ឆន្នេ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៤១. កិម្បុរិសសេវិតេ គន្ធមាទនេ, ឱសធេភិ សញ្ឆន្នេ;

តត្ថេវ តំ អបស្សន្តី, កិម្បុរិស កថំ អហំ កស្សំ.

៤២. វន្ទេ តេ អយិរព្រហ្មេ [អយ្យិរេ ព្រហ្មេ (ក.)], យោ មេ ឥច្ឆិតំ បតិំ វរាកិយា;

អមតេន អភិសិញ្ចិ, សមាគតាស្មិ បិយតមេន.

៤៣. វិចរាម ទានិ គិរិវន [គិរិវរ (សី. បី.)] នទិយោ, កុសុមាភិកិណ្ណសោតាយោ;

នានាទុមវសនាយោ [សេវនាយោ (បី.)], បិយំវទា អញ្ញមញ្ញស្សាតិ.

ចន្ទកិន្នរីជាតកំ [ចន្ទកិន្នរជាតកំ (សី. ស្យា. បី.)] ទុតិយំ.