៤៨៤. សាលិកេទារជាតកំ (១)

១. សម្បន្នំ សាលិកេទារំ, សុវា ភុញ្ជន្តិ កោសិយ;

បដិវេទេមិ តេ ព្រហ្មេ, ន នេ [តេ (សី. ស្យា.), នំ (សី. ស្យា. បី. អដ្ឋ.), តំ (ក. អដ្ឋ.)] វារេតុមុស្សហេ.

២. ឯកោ ច តត្ថ សកុណោ, យោ នេសំ [តេសំ (សី. អដ្ឋ.)] សព្ពសុន្ទរោ;

ភុត្វា សាលិំ យថាកាមំ, តុណ្ឌេនាទាយ គច្ឆតិ.

៣. ឱឌ្ឌេន្តុ [ឧជ្ឈុន្តុ (ស្យា. ក.) អង្គុត្តរនិកាយេ បស្សិតព្ពំ] វាឡបាសានិ, យថា វជ្ឈេថ សោ ទិជោ;

ជីវញ្ច នំ គហេត្វាន, អានយេហិ [អានយេថ (សី. បី.)] មមន្តិកេ.

៤. ឯតេ ភុត្វា បិវិត្វា ច [ភុត្វា ច បិត្វា ច (បី.)], បក្កមន្តិ វិហង្គមា;

ឯកោ ពទ្ធោស្មិ បាសេន, កិំ បាបំ បកតំ មយា.

៥. ឧទរំ នូន អញ្ញេសំ, សុវ អច្ចោទរំ តវ;

ភុត្វា សាលិំ យថាកាមំ, តុណ្ឌេនាទាយ គច្ឆសិ.

៦. កោដ្ឋំ នុ តត្ថ បូរេសិ, សុវ វេរំ នុ តេ មយា;

បុដ្ឋោ មេ សម្ម អក្ខាហិ, កុហិំ សាលិំ និទាហសិ [និធីយសិ (បី.)].

៧. ន មេ វេរំ តយា សទ្ធិំ, កោដ្ឋោ មយ្ហំ ន វិជ្ជតិ;

ឥណំ មុញ្ចាមិណំ ទម្មិ, សម្បត្តោ កោដសិម្ពលិំ;

និធិម្បិ តត្ថ និទហាមិ, ឯវំ ជានាហិ កោសិយ.

៨. កីទិសំ តេ ឥណទានំ, ឥណមោក្ខោ ច កីទិសោ;

និធិនិធានមក្ខាហិ, អថ បាសា បមោក្ខសិ.

៩. អជាតបក្ខា តរុណា, បុត្តកា មយ្ហ កោសិយ;

តេ មំ ភតា ភរិស្សន្តិ, តស្មា តេសំ ឥណំ ទទេ.

១០. មាតា បិតា ច មេ វុទ្ធា, ជិណ្ណកា គតយោព្ពនា;

តេសំ តុណ្ឌេន ហាតូន, មុញ្ចេ បុព្ពកតំ [បុព្ពេ កតំ (សី.)] ឥណំ.

១១. អញ្ញេបិ តត្ថ សកុណា, ខីណបក្ខា សុទុព្ពលា;

តេសំ បុញ្ញត្ថិកោ ទម្មិ, តំ និធិំ អាហុ បណ្ឌិតា.

១២. ឦទិសំ [ឯទិសំ (សី. បី.)] មេ ឥណទានំ, ឥណមោក្ខោ ច ឦទិសោ;

និធិនិធានមក្ខាមិ [និធិំ និធានំ អក្ខាតំ (សី. បី.)], ឯវំ ជានាហិ កោសិយ.

១៣. ភទ្ទកោ វតយំ បក្ខី, ទិជោ បរមធម្មិកោ;

ឯកច្ចេសុ មនុស្សេសុ, អយំ ធម្មោ ន វិជ្ជតិ.

១៤. ភុញ្ជ សាលិំ យថាកាមំ, សហ សព្ពេហិ ញាតិភិ;

បុនាបិ សុវ បស្សេមុ, បិយំ មេ តវ ទស្សនំ.

១៥. ភុត្តញ្ច បីតញ្ច តវស្សមម្ហិ [តវស្សព្យម្ហិ (ក.)], រត្តិញ្ច [រតី ច (សី. បី.)] នោ កោសិយ តេ សកាសេ;

និក្ខិត្តទណ្ឌេសុ ទទាហិ ទានំ, ជិណ្ណេ ច មាតាបិតរោ ភរស្សុ.

១៦. លក្ខី វត មេ ឧទបាទិ អជ្ជ, យោ អទ្ទសាសិំ បវរំ [យោហំ អទស្សំ បរមំ (ស្យា. ក.)] ទិជានំ;

សុវស្ស សុត្វាន សុភាសិតានិ, កាហាមិ បុញ្ញានិ អនប្បកានិ.

១៧. សោ កោសិយោ អត្តមនោ ឧទគ្គោ, អន្នញ្ច បានញ្ចភិសង្ខរិត្វា [អន្នញ្ច បានំ អភិសំហរិត្វា (ក.)];

អន្នេន បានេន បសន្នចិត្តោ, សន្តប្បយិ សមណព្រាហ្មណេ ចាតិ.

សាលិកេទារជាតកំ [កេទារជាតកំ (ក.)] បឋមំ.