៤៧៩. កាលិង្គពោធិជាតកំ (៦)

៦៧. រាជា កាលិង្គោ ចក្កវត្តិ, ធម្មេន បថវិមនុសាសំ [មនុសាសិ (ស្យា. ក.)];

អគមា [អគមាសិ (ស្យា. ក.)] ពោធិសមីបំ, នាគេន មហានុភាវេន.

៦៨. កាលិង្គោ ភារទ្វាជោ ច, រាជានំ កាលិង្គំ សមណកោលញ្ញំ;

ចក្កំ វត្តយតោ បរិគ្គហេត្វា [បរិណេត្វា (បី.)], បញ្ជលី ឥទមវោច.

៦៩. បច្ចោរោហ មហារាជ, ភូមិភាគោ យថា សមណុគ្គតោ [សមនុគីតោ (សី. ស្យា. បី.)];

ឥធ អនធិវរា ពុទ្ធា, អភិសម្ពុទ្ធា វិរោចន្តិ.

៧០. បទក្ខិណតោ អាវដ្ដា, តិណលតា អស្មិំ ភូមិភាគស្មិំ;

បថវិយា នាភិយំ [បុថុវិយា អយំ (សី.), បឋវិយា អយំ (ស្យា.), បុថវិយា’យំ (បី.)] មណ្ឌោ, ឥតិ នោ សុតំ មន្តេ មហារាជ [សុតំ មហារាជ (សី. ស្យា. បី.)].

៧១. សាគរបរិយន្តាយ, មេទិនិយា សព្ពភូតធរណិយា;

បថវិយា អយំ មណ្ឌោ, ឱរោហិត្វា នមោ ករោហិ.

៧២. យេ តេ ភវន្តិ នាគា ច, អភិជាតា ច កុញ្ជរា;

ឯត្តាវតា បទេសំ តេ, នាគា នេវ មុបយន្តិ.

៧៣. អភិជាតោ នាគោ [អភិជាតោ តេ នាគោ (សី. បី. អដ្ឋ.)] កាមំ, បេសេហិ កុញ្ជរំ ទន្តិំ;

ឯត្តាវតា បទេសោ [បទេសោ ច (ស្យា. ក.)], សក្កា [ន សក្កា (ស្យា.)] នាគេន មុបគន្តុំ.

៧៤. តំ សុត្វា រាជា កាលិង្គោ, វេយ្យញ្ជនិកវចោ និសាមេត្វា;

សម្បេសេសិ នាគំ ញស្សាម, មយំ យថិមស្សិទំ [យថា ឥទំ (សី. ស្យា. បី.)] វចនំ.

៧៥. សម្បេសិតោ ច រញ្ញា, នាគោ កោញ្ចោវ អភិនទិត្វាន;

បដិសក្កិត្វា [បដិឱសក្កិត្វា (ក.)] និសីទិ, គរុំវ ភារំ អសហមានោ.

៧៦. កាលិង្គភារទ្វាជោ, នាគំ ខីណាយុកំ វិទិត្វាន;

រាជានំ កាលិង្គំ, តរមានោ អជ្ឈភាសិត្ថ;

អញ្ញំ សង្កម នាគំ, នាគោ ខីណាយុកោ មហារាជ.

៧៧. តំ សុត្វា កាលិង្គោ, តរមានោ សង្កមី នាគំ;

សង្កន្តេវ រញ្ញេ, នាគោ តត្ថេវ បតិ [បតិតោ (ក.)] ភុម្យា;

វេយ្យញ្ជនិកវចោ, យថា តថា អហុ នាគោ.

៧៨. កាលិង្គោ រាជា កាលិង្គំ, ព្រាហ្មណំ ឯតទវោច;

ត្វមេវ អសិ សម្ពុទ្ធោ, សព្ពញ្ញូ សព្ពទស្សាវី.

៧៩. តំ អនធិវាសេន្តោ កាលិង្គំ [កាលិង្គោ (សី. ស្យា. បី.)], ព្រាហ្មណោ ឥទមវោច;

វេយ្យញ្ជនិកា ហិ មយំ, ពុទ្ធា សព្ពញ្ញុនោ មហារាជ.

៨០. សព្ពញ្ញូ សព្ពវិទូ ច, ពុទ្ធា ន លក្ខណេន ជានន្តិ;

អាគមពលសា [អាគមបុរិសា (បី.)] ហិ មយំ, ពុទ្ធា សព្ពំ បជានន្តិ.

៨១. មហយិត្វា សម្ពោធិំ [មហាយិត្វាន សម្ពោធិំ (សី. បី.), បហំសិត្វាន សម្ពោធិំ (ស្យា.), មមាយិត្វាន តំ ពោធិំ (ក.)], នានាតុរិយេហិ វជ្ជមានេហិ;

មាលាវិលេបនំ អភិហរិត្វា [មាលាគន្ធវិលេបនំ អាហរិត្វា (សី. បី.); បាការបរិក្ខេបំ ការេសិ; អថ រាជា បាយាសិ (សី. ស្យា. បី.)] អថ រាជា មនុបាយាសិ [បាការបរិក្ខេបំ ការេសិ; អថ រាជា បាយាសិ (សី. ស្យា. បី.)].

៨២. សដ្ឋិ វាហសហស្សានិ, បុប្ផានំ សន្និបាតយិ;

បូជេសិ រាជា កាលិង្គោ, ពោធិមណ្ឌមនុត្តរន្តិ [វរុត្តមេតិ (សី.)].

កាលិង្គពោធិជាតកំ ឆដ្ឋំ.