៤៦៩. មហាកណ្ហជាតកំ (៦)

៦១. កណ្ហោ កណ្ហោ ច ឃោរោ ច, សុក្កទាឋោ បភាសវា [បតាបវា (សី. ស្យា. បី.)];

ពទ្ធោ បញ្ចហិ រជ្ជូហិ, កិំ រវិ [ធីរ (សី. បី.), វីរ (ស្យា.)] សុនខោ តវ.

៦២. នាយំ មិគានមត្ថាយ, ឧសីនក [ឧសីនរ (សី. បី.), ឧសីន្នរ (ស្យា.)] ភវិស្សតិ;

មនុស្សានំ អនយោ ហុត្វា, តទា កណ្ហោ បមោក្ខតិ.

៦៣. បត្តហត្ថា សមណកា, មុណ្ឌា សង្ឃាដិបារុតា;

នង្គលេហិ កសិស្សន្តិ, តទា កណ្ហោ បមោក្ខតិ.

៦៤. តបស្សិនិយោ [តបនីយា (ក.) ទុតិយន្តបទានិ ហេតានិ] បព្ពជិតា, មុណ្ឌា សង្ឃាដិបារុតា;

យទា លោកេ គមិស្សន្តិ, តទា កណ្ហោ បមោក្ខតិ.

៦៥. ទីឃោត្តរោដ្ឋា ជដិលា, បង្កទន្តា រជស្សិរា;

ឥណំ ចោទាយ [វោទាយ (សី. បី.), ចោទយ (ស្យា.)] គច្ឆន្តិ, តទា កណ្ហោ បមោក្ខតិ.

៦៦. អធិច្ច វេទេ [វេទំ (ក.)] សាវិត្តិំ, យញ្ញតន្តញ្ច [តន្ត្រញ្ច (សី. ស្យា. បី.)] ព្រាហ្មណា;

ភតិកាយ យជិស្សន្តិ, តទា កណ្ហោ បមោក្ខតិ.

៦៧. មាតរំ បិតរញ្ចាបិ, ជិណ្ណកំ គតយោព្ពនំ;

បហូ សន្តោ [សន្តា (សី.)] ន ភរន្តិ, តទា កណ្ហោ បមោក្ខតិ.

៦៨. មាតរំ បិតរញ្ចាបិ, ជិណ្ណកំ គតយោព្ពនំ;

ពាលា តុម្ហេតិ វក្ខន្តិ, តទា កណ្ហោ បមោក្ខតិ.

៦៩. អាចរិយភរិយំ សខិំ [អាចរិយភរិយំ សខាភរិយំ (សី. បី.)], មាតុលានិំ បិតុច្ឆកិំ [បិតុច្ឆយំ (សី.), បិតុច្ឆសំ (បី.)];

យទា លោកេ គមិស្សន្តិ, តទា កណ្ហោ បមោក្ខតិ.

៧០. អសិចម្មំ គហេត្វាន, ខគ្គំ បគ្គយ្ហ ព្រាហ្មណា;

បន្ថឃាតំ ករិស្សន្តិ, តទា កណ្ហោ បមោក្ខតិ.

៧១. សុក្កច្ឆវី វេធវេរា, ថូលពាហូ អបាតុភា;

មិត្តភេទំ ករិស្សន្តិ, តទា កណ្ហោ បមោក្ខតិ.

៧២. មាយាវិនោ នេកតិកា, អសប្បុរិសចិន្តកា;

យទា លោកេ ភវិស្សន្តិ, តទា កណ្ហោ បមោក្ខតីតិ.

មហាកណ្ហជាតកំ ឆដ្ឋំ.