៩. បាបវគ្គោ

១១៦. អភិត្ថរេថ កល្យាណេ, បាបា ចិត្តំ និវារយេ;

ទន្ធញ្ហិ ករោតោ បុញ្ញំ, បាបស្មិំ រមតី មនោ.

១១៧. បាបញ្ចេ បុរិសោ កយិរា, ន នំ [ន តំ (សី. បី.)] កយិរា បុនប្បុនំ;

ន តម្ហិ ឆន្ទំ កយិរាថ, ទុក្ខោ បាបស្ស ឧច្ចយោ.

១១៨. បុញ្ញញ្ចេ បុរិសោ កយិរា, កយិរា នំ [កយិរាថេតំ (សី. ស្យា.), កយិរាថេនំ (បី.)] បុនប្បុនំ;

តម្ហិ ឆន្ទំ កយិរាថ, សុខោ បុញ្ញស្ស ឧច្ចយោ.

១១៩. បាបោបិ បស្សតិ ភទ្រំ, យាវ បាបំ ន បច្ចតិ;

យទា ច បច្ចតិ បាបំ, អថ បាបោ បាបានិ [អថ បាបានិ (?)] បស្សតិ.

១២០. ភទ្រោបិ បស្សតិ បាបំ, យាវ ភទ្រំ ន បច្ចតិ;

យទា ច បច្ចតិ ភទ្រំ, អថ ភទ្រោ ភទ្រានិ [អថ ភទ្រានិ (?)] បស្សតិ.

១២១. មាវមញ្ញេថ [មាប្បមញ្ញេថ (សី. ស្យា. បី.)] បាបស្ស, ន មន្តំ [ន មំ តំ (សី. បី.), ន មត្តំ (ស្យា.)] អាគមិស្សតិ;

ឧទពិន្ទុនិបាតេន, ឧទកុម្ភោបិ បូរតិ;

ពាលោ បូរតិ [បូរតិ ពាលោ (សី. ក.), អាបូរតិ ពាលោ (ស្យា.)] បាបស្ស, ថោកំ ថោកម្បិ [ថោក ថោកម្បិ (សី. បី.)] អាចិនំ.

១២២. មាវមញ្ញេថ បុញ្ញស្ស, ន មន្តំ អាគមិស្សតិ;

ឧទពិន្ទុនិបាតេន, ឧទកុម្ភោបិ បូរតិ;

ធីរោ បូរតិ បុញ្ញស្ស, ថោកំ ថោកម្បិ អាចិនំ.

១២៣. វាណិជោវ ភយំ មគ្គំ, អប្បសត្ថោ មហទ្ធនោ;

វិសំ ជីវិតុកាមោវ, បាបានិ បរិវជ្ជយេ.

១២៤. បាណិម្ហិ ចេ វណោ នាស្ស, ហរេយ្យ បាណិនា វិសំ;

នាព្ពណំ វិសមន្វេតិ, នត្ថិ បាបំ អកុព្ពតោ.

១២៥. យោ អប្បទុដ្ឋស្ស នរស្ស ទុស្សតិ, សុទ្ធស្ស បោសស្ស អនង្គណស្ស;

តមេវ ពាលំ បច្ចេតិ បាបំ, សុខុមោ រជោ បដិវាតំវ ខិត្តោ.

១២៦. គព្ភមេកេ ឧប្បជ្ជន្តិ, និរយំ បាបកម្មិនោ;

សគ្គំ សុគតិនោ យន្តិ, បរិនិព្ពន្តិ អនាសវា.

១២៧. ន អន្តលិក្ខេ ន សមុទ្ទមជ្ឈេ, ន បព្ពតានំ វិវរំ បវិស្ស [បវិសំ (ស្យា.)];

ន វិជ្ជតី [ន វិជ្ជតិ (ក. សី. បី. ក.)] សោ ជគតិប្បទេសោ, យត្ថដ្ឋិតោ [យត្រដ្ឋិតោ (ស្យា.)] មុច្ចេយ្យ បាបកម្មា.

១២៨. ន អន្តលិក្ខេ ន សមុទ្ទមជ្ឈេ, ន បព្ពតានំ វិវរំ បវិស្ស;

ន វិជ្ជតី សោ ជគតិប្បទេសោ, យត្ថដ្ឋិតំ [យត្រដ្ឋិតំ (ស្យា.)] នប្បសហេយ្យ មច្ចុ.

បាបវគ្គោ នវមោ និដ្ឋិតោ.