២៣. នាគវគ្គោ

៣២០. អហំ នាគោវ សង្គាមេ, ចាបតោ បតិតំ សរំ;

អតិវាក្យំ តិតិក្ខិស្សំ, ទុស្សីលោ ហិ ពហុជ្ជនោ.

៣២១. ទន្តំ នយន្តិ សមិតិំ, ទន្តំ រាជាភិរូហតិ;

ទន្តោ សេដ្ឋោ មនុស្សេសុ, យោតិវាក្យំ តិតិក្ខតិ.

៣២២. វរមស្សតរា ទន្តា, អាជានីយា ច [អាជានីយាវ (ស្យា.)] សិន្ធវា;

កុញ្ជរា ច [កុញ្ជរាវ (ស្យា.)] មហានាគា, អត្តទន្តោ តតោ វរំ.

៣២៣. ន ហិ ឯតេហិ យានេហិ, គច្ឆេយ្យ អគតំ ទិសំ;

យថាត្តនា សុទន្តេន, ទន្តោ ទន្តេន គច្ឆតិ.

៣២៤. ធនបាលោ [ធនបាលកោ (សី. ស្យា. កំ. បី.)] នាម កុញ្ជរោ, កដុកភេទនោ [កដុកប្បភេទនោ (សី. ស្យា. បី.)] ទុន្និវារយោ;

ពទ្ធោ កពឡំ ន ភុញ្ជតិ, សុមរតិ [សុសរតិ (ក.)] នាគវនស្ស កុញ្ជរោ.

៣២៥. មិទ្ធី យទា ហោតិ មហគ្ឃសោ ច, និទ្ទាយិតា សម្បរិវត្តសាយី;

មហាវរាហោវ និវាបបុដ្ឋោ, បុនប្បុនំ គព្ភមុបេតិ មន្ទោ.

៣២៦. ឥទំ បុរេ ចិត្តមចារិ ចារិកំ, យេនិច្ឆកំ យត្ថកាមំ យថាសុខំ;

តទជ្ជហំ និគ្គហេស្សាមិ យោនិសោ, ហត្ថិប្បភិន្នំ វិយ អង្កុសគ្គហោ.

៣២៧. អប្បមាទរតា ហោថ, សចិត្តមនុរក្ខថ;

ទុគ្គា ឧទ្ធរថត្តានំ, បង្កេ សន្នោវ [សត្តោវ (សី. បី.)] កុញ្ជរោ.

៣២៨. សចេ លភេថ និបកំ សហាយំ, សទ្ធិំ ចរំ សាធុវិហារិធីរំ;

អភិភុយ្យ សព្ពានិ បរិស្សយានិ, ចរេយ្យ តេនត្តមនោ សតីមា.

៣២៩. នោ ចេ លភេថ និបកំ សហាយំ, សទ្ធិំ ចរំ សាធុវិហារិធីរំ;

រាជាវ រដ្ឋំ វិជិតំ បហាយ, ឯកោ ចរេ មាតង្គរញ្ញេវ នាគោ.

៣៣០. ឯកស្ស ចរិតំ សេយ្យោ, នត្ថិ ពាលេ សហាយតា;

ឯកោ ចរេ ន ច បាបានិ កយិរា, អប្បោស្សុក្កោ មាតង្គរញ្ញេវ នាគោ.

៣៣១. អត្ថម្ហិ ជាតម្ហិ សុខា សហាយា, តុដ្ឋី សុខា យា ឥតរីតរេន;

បុញ្ញំ សុខំ ជីវិតសង្ខយម្ហិ, សព្ពស្ស ទុក្ខស្ស សុខំ បហានំ.

៣៣២. សុខា មត្តេយ្យតា លោកេ, អថោ បេត្តេយ្យតា សុខា;

សុខា សាមញ្ញតា លោកេ, អថោ ព្រហ្មញ្ញតា សុខា.

៣៣៣. សុខំ យាវ ជរា សីលំ, សុខា សទ្ធា បតិដ្ឋិតា;

សុខោ បញ្ញាយ បដិលាភោ, បាបានំ អករណំ សុខំ.

នាគវគ្គោ តេវីសតិមោ និដ្ឋិតោ.