៩. វេស្សន្តរចរិយា

៦៧. ‘‘យា មេ អហោសិ ជនិកា, ផុស្សតី [ផុសតី (សី.)] នាម ខត្តិយា;

សា អតីតាសុ ជាតីសុ, សក្កស្ស មហេសី បិយា.

៦៨. ‘‘តស្សា អាយុក្ខយំ ញត្វា, ទេវិន្ទោ ឯតទព្រវិ;

‘ទទាមិ តេ ទស វរេ, វរភទ្ទេ យទិច្ឆសិ’.

៦៩. ‘‘ឯវំ វុត្តា ច សា ទេវី, សក្កំ បុនិទមព្រវិ;

‘កិំ នុ មេ អបរាធត្ថិ, កិំ នុ ទេស្សា អហំ តវ;

រម្មា ចាវេសិ មំ ឋានា, វាតោវ ធរណីរុហំ’.

៧០. ‘‘ឯវំ វុត្តោ ច សោ សក្កោ, បុន តស្សិទមព្រវិ;

‘ន ចេវ តេ កតំ បាបំ, ន ច មេ ត្វំសិ អប្បិយា.

៧១. ‘‘‘ឯត្តកំយេវ តេ អាយុ, ចវនកាលោ ភវិស្សតិ;

បដិគ្គណ្ហ មយា ទិន្នេ, វរេ ទស វរុត្តមេ’.

៧២. ‘‘សក្កេន សា ទិន្នវរា, តុដ្ឋហដ្ឋា បមោទិតា;

មមំ អព្ភន្តរំ កត្វា, ផុស្សតី ទស វរេ វរី.

៧៣. ‘‘តតោ ចុតា សា ផុស្សតី, ខត្តិយេ ឧបបជ្ជថ;

ជេតុត្តរម្ហិ នគរេ, សញ្ជយេន សមាគមិ.

៧៤. ‘‘យទាហំ ផុស្សតិយា កុច្ឆិំ, ឱក្កន្តោ បិយមាតុយា;

មម តេជេន មេ មាតា, សទា ទានរតា អហុ.

៧៥. ‘‘អធនេ អាតុរេ ជិណ្ណេ, យាចកេ អទ្ធិកេ [បថិកេ (ក.)] ជនេ;

សមណេ ព្រាហ្មណេ ខីណេ, ទេតិ ទានំ អកិញ្ចនេ.

៧៦. ‘‘ទស មាសេ ធារយិត្វាន, ករោន្តេ បុរំ បទក្ខិណំ;

វេស្សានំ វីថិយា មជ្ឈេ, ជនេសិ ផុស្សតី មមំ.

៧៧. ‘‘ន មយ្ហំ មត្តិកំ នាមំ, នបិ បេត្តិកសម្ភវំ;

ជាតេត្ថ វេស្សវីថិយា, តស្មា វេស្សន្តរោ អហុ.

៧៨. ‘‘យទាហំ ទារកោ ហោមិ, ជាតិយា អដ្ឋវស្សិកោ;

តទា និសជ្ជ បាសាទេ, ទានំ ទាតុំ វិចិន្តយិំ.

៧៩. ‘‘‘ហទយំ ទទេយ្យំ ចក្ខុំ, មំសម្បិ រុធិរម្បិ ច;

ទទេយ្យំ កាយំ សាវេត្វា, យទិ កោចិ យាចយេ មមំ’.

៨០. ‘‘សភាវំ ចិន្តយន្តស្ស, អកម្បិតមសណ្ឋិតំ;

អកម្បិ តត្ថ បថវី, សិនេរុវនវដំសកា.

៨១. ‘‘អន្វទ្ធមាសេ បន្នរសេ, បុណ្ណមាសេ ឧបោសថេ;

បច្ចយំ នាគមារុយ្ហ, ទានំ ទាតុំ ឧបាគមិំ.

៨២. ‘‘កលិង្គរដ្ឋវិសយា, ព្រាហ្មណា ឧបគញ្ឆុ មំ;

អយាចុំ មំ ហត្ថិនាគំ, ធញ្ញំ មង្គលសម្មតំ.

៨៣. ‘‘អវុដ្ឋិកោ ជនបទោ, ទុព្ភិក្ខោ ឆាតកោ មហា;

ទទាហិ បវរំ នាគំ, សព្ពសេតំ គជុត្តមំ.

៨៤. ‘‘ទទាមិ ន វិកម្បាមិ, យំ មំ យាចន្តិ ព្រាហ្មណា;

សន្តំ នប្បតិគូហាមិ [នប្បតិគុយ្ហាមិ (សី. ក.)], ទានេ មេ រមតេ មនោ.

៨៥. ‘‘ន មេ យាចកមនុប្បត្តេ, បដិក្ខេបោ អនុច្ឆវោ;

‘មា មេ ភិជ្ជិ សមាទានំ, ទស្សាមិ វិបុលំ គជំ’.

៨៦. ‘‘នាគំ គហេត្វា សោណ្ឌាយ, ភិង្គារេ រតនាមយេ;

ជលំ ហត្ថេ អាកិរិត្វា, ព្រាហ្មណានំ អទំ គជំ.

៨៧. ‘‘បុនាបរំ ទទន្តស្ស, សព្ពសេតំ គជុត្តមំ;

តទាបិ បថវី កម្បិ, សិនេរុវនវដំសកា.

៨៨. ‘‘តស្ស នាគស្ស ទានេន, សិវយោ កុទ្ធា សមាគតា;

បព្ពាជេសុំ សកា រដ្ឋា, ‘វង្កំ គច្ឆតុ បព្ពតំ’.

៨៩. ‘‘តេសំ និច្ឆុភមានានំ, អកម្បិត្ថមសណ្ឋិតំ;

មហាទានំ បវត្តេតុំ, ឯកំ វរមយាចិសំ.

៩០. ‘‘យាចិតា សិវយោ សព្ពេ, ឯកំ វរមទំសុ មេ;

សាវយិត្វា កណ្ណភេរិំ, មហាទានំ ទទាមហំ.

៩១. ‘‘អថេត្ថ វត្តតី សទ្ទោ, តុមុលោ ភេរវោ មហា;

ទានេនិមំ នីហរន្តិ, បុន ទានំ ទទាតយំ.

៩២. ‘‘ហត្ថិំ អស្សេ រថេ ទត្វា, ទាសិំ ទាសំ គវំ ធនំ;

មហាទានំ ទទិត្វាន, នគរា និក្ខមិំ តទា.

៩៣. ‘‘និក្ខមិត្វាន នគរា, និវត្តិត្វា វិលោកិតេ;

តទាបិ បថវី កម្បិ, សិនេរុវនវដំសកា.

៩៤. ‘‘ចតុវាហិំ រថំ ទត្វា, ឋត្វា ចាតុម្មហាបថេ;

ឯកាកិយោ អទុតិយោ, មទ្ទិទេវិំ ឥទមព្រវិំ.

៩៥. ‘‘‘ត្វំ មទ្ទិ កណ្ហំ គណ្ហាហិ, លហុកា ឯសា កនិដ្ឋិកា;

អហំ ជាលិំ គហេស្សាមិ, គរុកោ ភាតិកោ ហិ សោ’.

៩៦. ‘‘បទុមំ បុណ្ឌរីកំវ, មទ្ទី កណ្ហាជិនគ្គហី;

អហំ សុវណ្ណពិម្ពំវ, ជាលិំ ខត្តិយមគ្គហិំ.

៩៧. ‘‘អភិជាតា សុខុមាលា, ខត្តិយា ចតុរោ ជនា;

វិសមំ សមំ អក្កមន្តា, វង្កំ គច្ឆាម បព្ពតំ.

៩៨. ‘‘យេ កេចិ មនុជា ឯន្តិ, អនុមគ្គេ បដិប្បថេ;

មគ្គន្តេ បដិបុច្ឆាម, ‘កុហិំ វង្កន្ត [វង្កត (សី.)] បព្ពតោ’.

៩៩. ‘‘តេ តត្ថ អម្ហេ បស្សិត្វា, ករុណំ គិរមុទីរយុំ;

ទុក្ខំ តេ បដិវេទេន្តិ, ទូរេ វង្កន្តបព្ពតោ.

១០០. ‘‘យទិ បស្សន្តិ បវនេ, ទារកា ផលិនេ ទុមេ;

តេសំ ផលានំ ហេតុម្ហិ, ឧបរោទន្តិ ទារកា.

១០១. ‘‘រោទន្តេ ទារកេ ទិស្វា, ឧព្ពិទ្ធា [ឧព្ពិគ្គា (ស្យា. កំ.)] វិបុលា ទុមា;

សយមេវោណមិត្វាន, ឧបគច្ឆន្តិ ទារកេ.

១០២. ‘‘ឥទំ អច្ឆរិយំ ទិស្វា, អព្ភុតំ លោមហំសនំ;

សាហុការំ [សាធុការំ (សព្ពត្ថ)] បវត្តេសិ, មទ្ទី សព្ពង្គសោភនា.

១០៣. ‘‘អច្ឆេរំ វត លោកស្មិំ, អព្ភុតំ លោមហំសនំ;

វេស្សន្តរស្ស តេជេន, សយមេវោណតា ទុមា.

១០៤. ‘‘សង្ខិបិំសុ បថំ យក្ខា, អនុកម្បាយ ទារកេ;

និក្ខន្តទិវសេនេវ [និក្ខន្តទិវសេយេវ (សី.)], ចេតរដ្ឋមុបាគមុំ.

១០៥. ‘‘សដ្ឋិរាជសហស្សានិ, តទា វសន្តិ មាតុលេ;

សព្ពេ បញ្ជលិកា ហុត្វា, រោទមានា ឧបាគមុំ.

១០៦. ‘‘តត្ថ វត្តេត្វា សល្លាបំ, ចេតេហិ ចេតបុត្តេហិ;

តេ តតោ និក្ខមិត្វាន, វង្កំ អគមុ បព្ពតំ.

១០៧. ‘‘អាមន្តយិត្វា ទេវិន្ទោ, វិស្សកម្មំ [វិសុកម្មំ (ក.)] មហិទ្ធិកំ;

អស្សមំ សុកតំ រម្មំ, បណ្ណសាលំ សុមាបយ.

១០៨. ‘‘សក្កស្ស វចនំ សុត្វា, វិស្សកម្មោ មហិទ្ធិកោ;

អស្សមំ សុកតំ រម្មំ, បណ្ណសាលំ សុមាបយិ.

១០៩. ‘‘អជ្ឈោគាហេត្វា បវនំ, អប្បសទ្ទំ និរាកុលំ;

ចតុរោ ជនា មយំ តត្ថ, វសាម បព្ពតន្តរេ.

១១០. ‘‘អហញ្ច មទ្ទិទេវី ច, ជាលី កណ្ហាជិនា ចុភោ;

អញ្ញមញ្ញំ សោកនុទា, វសាម អស្សមេ តទា.

១១១. ‘‘ទារកេ អនុរក្ខន្តោ, អសុញ្ញោ ហោមិ អស្សមេ;

មទ្ទី ផលំ អាហរិត្វា, បោសេតិ សា តយោ ជនេ.

១១២. ‘‘បវនេ វសមានស្ស, អទ្ធិកោ មំ ឧបាគមិ;

អាយាចិ បុត្តកេ មយ្ហំ, ជាលិំ កណ្ហាជិនំ ចុភោ.

១១៣. ‘‘យាចកំ ឧបគតំ ទិស្វា, ហាសោ មេ ឧបបជ្ជថ;

ឧភោ បុត្តេ គហេត្វាន, អទាសិំ ព្រាហ្មណេ តទា.

១១៤. ‘‘សកេ បុត្តេ ចជន្តស្ស, ជូជកេ ព្រាហ្មណេ យទា;

តទាបិ បថវី កម្បិ, សិនេរុវនវដំសកា.

១១៥. ‘‘បុនទេវ សក្កោ ឱរុយ្ហ, ហុត្វា ព្រាហ្មណសន្និភោ;

អាយាចិ មំ មទ្ទិទេវិំ, សីលវន្តិំ បតិព្ពតំ.

១១៦. ‘‘មទ្ទិំ ហត្ថេ គហេត្វាន, ឧទកញ្ជលិ បូរិយ;

បសន្នមនសង្កប្បោ, តស្ស មទ្ទិំ អទាសហំ.

១១៧. ‘‘មទ្ទិយា ទីយមានាយ, គគនេ ទេវា បមោទិតា;

តទាបិ បថវី កម្បិ, សិនេរុវនវដំសកា.

១១៨. ‘‘ជាលិំ កណ្ហាជិនំ ធីតំ, មទ្ទិទេវិំ បតិព្ពតំ;

ចជមានោ ន ចិន្តេសិំ, ពោធិយាយេវ ការណា.

១១៩. ‘‘ន មេ ទេស្សា ឧភោ បុត្តា, មទ្ទិទេវី ន ទេស្សិយា;

សព្ពញ្ញុតំ បិយំ មយ្ហំ, តស្មា បិយេ អទាសហំ.

១២០. ‘‘បុនាបរំ ព្រហារញ្ញេ, មាតាបិតុសមាគមេ;

ករុណំ បរិទេវន្តេ, សល្លបន្តេ សុខំ ទុខំ.

១២១. ‘‘ហិរោត្តប្បេន គរុនា [គរុនំ (ស្យា. ក.)], ឧភិន្នំ ឧបសង្កមិ;

តទាបិ បថវី កម្បិ, សិនេរុវនវដំសកា.

១២២. ‘‘បុនាបរំ ព្រហារញ្ញា, និក្ខមិត្វា សញាតិភិ;

បវិសាមិ បុរំ រម្មំ, ជេតុត្តរំ បុរុត្តមំ.

១២៣. ‘‘រតនានិ សត្ត វស្សិំសុ, មហាមេឃោ បវស្សថ;

តទាបិ បថវី កម្បិ, សិនេរុវនវដំសកា.

១២៤. ‘‘អចេតនាយំ បថវី, អវិញ្ញាយ សុខំ ទុខំ;

សាបិ ទានពលា មយ្ហំ, សត្តក្ខត្តុំ បកម្បថា’’តិ.

វេស្សន្តរចរិយំ នវមំ.