២. សង្ខចរិយា

១១. ‘‘បុនាបរំ យទា ហោមិ, ព្រាហ្មណោ សង្ខសវ្ហយោ;

មហាសមុទ្ទំ តរិតុកាមោ, ឧបគច្ឆាមិ បដ្ដនំ.

១២. ‘‘តត្ថទ្ទសំ បដិបថេ, សយម្ភុំ អបរាជិតំ;

កន្តារទ្ធានំ បដិបន្នំ [កន្តារទ្ធានបដិបន្នំ (សី. ស្យា.)], តត្តាយ កឋិនភូមិយា.

១៣. ‘‘តមហំ បដិបថេ ទិស្វា, ឥមមត្ថំ វិចិន្តយិំ;

‘ឥទំ ខេត្តំ អនុប្បត្តំ, បុញ្ញកាមស្ស ជន្តុនោ.

១៤. ‘‘‘យថា កស្សកោ បុរិសោ, ខេត្តំ ទិស្វា មហាគមំ;

តត្ថ ពីជំ ន រោបេតិ, ន សោ ធញ្ញេន អត្ថិកោ.

១៥. ‘‘‘ឯវមេវាហំ បុញ្ញកាមោ, ទិស្វា ខេត្តវរុត្តមំ;

យទិ តត្ថ ការំ ន ករោមិ, នាហំ បុញ្ញេន អត្ថិកោ.

១៦. ‘‘‘យថា អមច្ចោ មុទ្ទិកាមោ, រញ្ញោ អន្តេបុរេ ជនេ;

ន ទេតិ តេសំ ធនធញ្ញំ, មុទ្ទិតោ បរិហាយតិ.

១៧. ‘‘‘ឯវមេវាហំ បុញ្ញកាមោ, វិបុលំ ទិស្វាន ទក្ខិណំ;

យទិ តស្ស ទានំ ន ទទាមិ, បរិហាយិស្សាមិ បុញ្ញតោ’.

១៨. ‘‘ឯវាហំ ចិន្តយិត្វាន, ឱរោហិត្វា ឧបាហនា;

តស្ស បាទានិ វន្ទិត្វា, អទាសិំ ឆត្តុបាហនំ.

១៩. ‘‘តេនេវាហំ សតគុណតោ, សុខុមាលោ សុខេធិតោ;

អបិ ច ទានំ បរិបូរេន្តោ, ឯវំ តស្ស អទាសហ’’ន្តិ.

សង្ខចរិយំ ទុតិយំ.