៧. ផលទាយកត្ថេរអបទានំ

៣៩. ‘‘បព្ពតេ ហិមវន្តម្ហិ, ខរាជិនធរោ អហំ;

ផុស្សំ ជិនវរំ ទិស្វា, ផលហត្ថោ ផលំ អទំ.

៤០. ‘‘យមហំ ផលមទាសិំ, វិប្បសន្នេន ចេតសា;

ភវេ និព្ពត្តមានម្ហិ, ផលំ និព្ពត្តតេ មម.

៤១. ‘‘ទ្វេនវុតេ ឥតោ កប្បេ, យំ ផលំ អទទិំ អហំ;

ទុគ្គតិំ នាភិជានាមិ, ផលទានស្សិទំ ផលំ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលទាយកោ ថេរោ ឥមា គាថាយោ អភាសិត្ថាតិ.

ផលទាយកត្ថេរស្សាបទានំ សត្តមំ.