៤. អធោបុប្ផិយត្ថេរអបទានំ

២២. ‘‘អភិភូ នាម សោ ភិក្ខុ, សិខិនោ អគ្គសាវកោ;

មហានុភាវោ តេវិជ្ជោ, ហិមវន្តំ ឧបាគមិ.

២៣. ‘‘អហម្បិ ហិមវន្តម្ហិ, រមណីយស្សមេ ឥសិ;

វសាមិ អប្បមញ្ញាសុ, ឥទ្ធីសុ ច តទា វសី.

២៤. ‘‘បក្ខិជាតោ វិយាកាសេ, បព្ពតំ អធិវត្តយិំ [អភិបត្ថយិំ (ស្យា.), អភិមត្ថយិំ (ក.), អធិវត្ថយិន្តិ បព្ពតស្ស ឧបរិ គច្ឆិន្តិអត្ថោ];

អធោបុប្ផំ គហេត្វាន, អាគច្ឆិំ [អគច្ឆិំ (ក.)] បព្ពតំ អហំ.

២៥. ‘‘សត្ត បុប្ផានិ គណ្ហិត្វា, មត្ថកេ ឱកិរិំ អហំ;

អាលោកិតេ [អាលោកិតោ (ស្យា.)] ច វីរេន, បក្កាមិំ បាចិនាមុខោ.

២៦. ‘‘អាវាសំ អភិសម្ភោសិំ, បត្វាន អស្សមំ អហំ;

ខារិភារំ គហេត្វាន, បាយាសិំ [បាវិសិំ (សី.)] បព្ពតន្តរំ.

២៧. ‘‘អជគរោ មំ បីឡេសិ, ឃោររូបោ មហព្ពលោ;

បុព្ពកម្មំ សរិត្វាន, តត្ថ កាលង្កតោ អហំ.

២៨. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ ផលំ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អធោបុប្ផិយោ ថេរោ ឥមា គាថាយោ អភាសិត្ថាតិ.

អធោបុប្ផិយត្ថេរស្សាបទានំ ចតុត្ថំ.