២. គតសញ្ញកត្ថេរអបទានំ

១០. ‘‘ជាតិយា សត្តវស្សោហំ, បព្ពជិំ អនគារិយំ;

អវន្ទិំ សត្ថុនោ បាទេ, វិប្បសន្នេន ចេតសា.

១១. ‘‘សត្តនង្គលកីបុប្ផេ, អាកាសេ ឧក្ខិបិំ អហំ;

តិស្សំ ពុទ្ធំ សមុទ្ទិស្ស, អនន្តគុណសាគរំ.

១២. ‘‘សុគតានុគតំ មគ្គំ, បូជេត្វា ហដ្ឋមានសោ;

អញ្ជលិញ្ច [អញ្ជលិស្ស (ក.)] តទាកាសិំ, បសន្នោ សេហិ បាណិភិ.

១៣. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៤. ‘‘ឥតោ អដ្ឋមកេ កប្បេ, តយោ អគ្គិសិខា អហុ;

សត្តរតនសម្បន្នា, ចក្កវត្តី មហព្ពលា.

១៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គតសញ្ញកោ ថេរោ ឥមា គាថាយោ អភាសិត្ថាតិ.

គតសញ្ញកត្ថេរស្សាបទានំ ទុតិយំ.