១. សកចិន្តនិយត្ថេរអបទានំ

១. ‘‘បវនំ កាននំ ទិស្វា, អប្បសទ្ទមន្នាវិលំ;

ឥសីនំ អនុចិណ្ណំវ, អាហុតីនំ បដិគ្គហំ.

២. ‘‘ថូបំ កត្វាន បុលិនំ [វេឡុនា (អដ្ឋ.), វេឡិនំ (ស្យា.)], នានាបុប្ផំ សមោកិរិំ;

សម្មុខា វិយ សម្ពុទ្ធំ, និម្មិតំ អភិវន្ទហំ.

៣. ‘‘សត្តរតនសម្បន្នោ, រាជា រដ្ឋម្ហិ ឥស្សរោ;

សកកម្មាភិរទ្ធោហំ, បុប្ផបូជាយិទំ [ថូបបូជាយិទំ (សី.)] ផលំ.

៤. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ [ថូបបូជាយិទំ (សី.)] ផលំ.

៥. ‘‘អសីតិកប្បេនន្តយសោ, ចក្កវត្តី អហោសហំ;

សត្តរតនសម្បន្នោ, ចតុទីបម្ហិ ឥស្សរោ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សកចិន្តនិយោ ថេរោ ឥមា គាថាយោ អភាសិត្ថាតិ.

សកចិន្តនិយត្ថេរស្សាបទានំ បឋមំ.