៧. បញ្ចទីបកត្ថេរអបទានំ

៥០. ‘‘បទុមុត្តរពុទ្ធស្ស, សព្ពភូតានុកម្បិនោ;

សទ្ទហិត្វាន [សុសណ្ឋហិត្វា (សី.)] សទ្ធម្មេ, ឧជុទិដ្ឋិ អហោសហំ.

៥១. ‘‘បទីបទានំ បាទាសិំ, បរិវារេត្វាន ពោធិយំ;

សទ្ទហន្តោ បទីបានិ, អករិំ តាវទេ អហំ.

៥២. ‘‘យំ យំ យោនុបបជ្ជាមិ, ទេវត្តំ អថ មានុសំ;

អាកាសេ ឧក្កំ ធារេន្តិ, ទីបទានស្សិទំ ផលំ.

៥៣. ‘‘តិរោកុដ្ដំ តិរោសេលំ, សមតិគ្គយ្ហ បព្ពតំ;

សមន្តា យោជនសតំ, ទស្សនំ អនុភោមហំ.

៥៤. ‘‘តេន កម្មាវសេសេន, បត្តោម្ហិ អាសវក្ខយំ;

ធារេមិ អន្តិមំ ទេហំ, ទ្វិបទិន្ទស្ស សាសនេ.

៥៥. ‘‘ចតុត្តិំសេ កប្បសតេ, សតចក្ខុសនាមកា;

រាជាហេសុំ មហាតេជា, ចក្កវត្តី មហព្ពលា.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បញ្ចទីបកោ ថេរោ ឥមា គាថាយោ អភាសិត្ថាតិ.

បញ្ចទីបកត្ថេរស្សាបទានំ សត្តមំ.