១០. ឧបវានត្ថេរអបទានំ

១២២. ‘‘បទុមុត្តរោ នាម ជិនោ, សព្ពធម្មាន បារគូ;

ជលិត្វា អគ្គិក្ខន្ធោវ, សម្ពុទ្ធោ បរិនិព្ពុតោ.

១២៣. ‘‘មហាជនា សមាគម្ម, បូជយិត្វា តថាគតំ;

ចិតំ កត្វាន សុគតំ, សរីរំ អភិរោបយុំ.

១២៤. ‘‘សរីរកិច្ចំ កត្វាន, ធាតុំ តត្ថ សមានយុំ;

សទេវមនុស្សា សព្ពេ, ពុទ្ធថូបំ អកំសុ តេ.

១២៥. ‘‘បឋមា កញ្ចនមយា, ទុតិយា ច មណិមយា;

តតិយា រូបិយមយា, ចតុត្ថី ផលិកាមយា.

១២៦. ‘‘តត្ថ បញ្ចមិកា ចេវ [តត្ថ បញ្ចមិកា ចេតិ (សី.)], លោហិតង្កមយា អហុ;

ឆដ្ឋា មសារគល្លស្ស, សព្ពំ រតនមយូបរិ.

១២៧. ‘‘ជង្ឃា មណិមយា អាសិ, វេទិកា រតនាមយា;

សព្ពសោណ្ណមយោ ថូបោ, ឧទ្ធំ យោជនមុគ្គតោ.

១២៨. ‘‘ទេវា តត្ថ សមាគន្ត្វា, ឯកតោ មន្តយុំ តទា;

‘មយម្បិ ថូបំ កស្សាម, លោកនាថស្ស តាទិនោ.

១២៩. ‘‘‘ធាតុ អាវេណិកា នត្ថិ, សរីរំ ឯកបិណ្ឌិតំ;

ឥមម្ហិ ពុទ្ធថូបម្ហិ, កស្សាម កញ្ចុកំ មយំ’.

១៣០. ‘‘ទេវា សត្តហិ រត្នេហិ, អញ្ញំ វឌ្ឍេសុំ យោជនំ;

ថូបោ ទ្វិយោជនុព្ពេធោ, តិមិរំ ព្យបហន្តិ សោ.

១៣១. ‘‘នាគា តត្ថ សមាគន្ត្វា, ឯកតោ មន្តយុំ តទា;

‘មនុស្សា ចេវ ទេវា ច, ពុទ្ធថូបំ អកំសុ តេ.

១៣២. ‘‘‘មា នោ បមត្តា អស្សុម្ហ, អប្បមត្តា សទេវកា;

មយម្បិ ថូបំ កស្សាម, លោកនាថស្ស តាទិនោ’.

១៣៣. ‘‘ឥន្ទនីលំ មហានីលំ, អថោ ជោតិរសំ មណិំ;

ឯកតោ សន្និបាតេត្វា, ពុទ្ធថូបំ អឆាទយុំ.

១៣៤. ‘‘សព្ពំ មណិមយំ អាសិ, យាវតា [តាវតា (ក.)] ពុទ្ធចេតិយំ;

តិយោជនសមុព្ពេធំ, អាលោកករណំ តទា.

១៣៥. ‘‘គរុឡា ច សមាគន្ត្វា, ឯកតោ មន្តយុំ តទា;

‘មនុស្សា ទេវនាគា ច, ពុទ្ធបូជំ អកំសុ តេ.

១៣៦. ‘‘‘មា នោ បមត្តា អស្សុម្ហ, អប្បមត្តា សទេវកា;

មយម្បិ ថូបំ កស្សាម, លោកនាថស្ស តាទិនោ’.

១៣៧. ‘‘សព្ពំ មណិមយំ ថូបំ, អករុំ តេ ច កញ្ចុកំ;

យោជនំ តេបិ វឌ្ឍេសុំ, អាយតំ ពុទ្ធចេតិយំ.

១៣៨. ‘‘ចតុយោជនមុព្ពេធោ, ពុទ្ធថូបោ វិរោចតិ;

ឱភាសេតិ ទិសា សព្ពា, សតរំសីវ ឧគ្គតោ.

១៣៩. ‘‘កុម្ភណ្ឌា ច សមាគន្ត្វា, ឯកតោ មន្តយុំ តទា;

‘មនុស្សា ចេវ ទេវា ច, នាគា ច គរុឡា តថា.

១៤០. ‘‘‘បច្ចេកំ ពុទ្ធសេដ្ឋស្ស, អកំសុ ថូបមុត្តមំ;

មា នោ បមត្តា អស្សុម្ហ, អប្បមត្តា សទេវកា.

១៤១. ‘‘‘មយម្បិ ថូបំ កស្សាម, លោកនាថស្ស តាទិនោ;

រតនេហិ ឆាទេស្សាម, អាយតំ ពុទ្ធចេតិយំ’.

១៤២. ‘‘យោជនំ តេបិ វឌ្ឍេសុំ, អាយតំ ពុទ្ធចេតិយំ;

បញ្ចយោជនមុព្ពេធោ, ថូបោ ឱភាសតេ តទា.

១៤៣. ‘‘យក្ខា តត្ថ សមាគន្ត្វា, ឯកតោ មន្តយុំ តទា;

‘មនុស្សា ទេវនាគា ច, គរុឡា ច កុម្ភណ្ឌកា.

១៤៤. ‘‘‘បច្ចេកំ ពុទ្ធសេដ្ឋស្ស, អកំសុ ថូបមុត្តមំ;

មា នោ បមត្តា អស្សុម្ហ, អប្បមត្តា សទេវកា.

១៤៥. ‘‘‘មយម្បិ ថូបំ កស្សាម, លោកនាថស្ស តាទិនោ;

ផលិកា ឆាទយិស្សាម, អាយតំ ពុទ្ធចេតិយំ’.

១៤៦. ‘‘យោជនំ តេបិ វឌ្ឍេសុំ, អាយតំ ពុទ្ធចេតិយំ;

ឆយោជនិកមុព្ពេធោ, ថូបោ ឱភាសតេ តទា.

១៤៧. ‘‘គន្ធព្ពា ច សមាគន្ត្វា, ឯកតោ មន្តយុំ តទា;

‘មនុជា ទេវតា នាគា, កុម្ភណ្ឌា គរុឡា តថា [កុម្ភណ្ឌា ច យក្ខា តថា (សី.)].

១៤៨. ‘‘‘សព្ពេ អកំសុ ពុទ្ធថូបំ, មយមេត្ថ អការកា;

មយម្បិ ថូបំ កស្សាម, លោកនាថស្ស តាទិនោ’.

១៤៩. ‘‘វេទិយោ សត្ត កត្វាន, ធជំ ឆត្តំ អកំសុ តេ;

សព្ពសោណ្ណមយំ ថូបំ, គន្ធព្ពា ការយុំ តទា.

១៥០. ‘‘សត្តយោជនមុព្ពេធោ, ថូបោ ឱភាសតេ តទា;

រត្តិន្ទិវា ន ញាយន្តិ, អាលោកោ ហោតិ សព្ពទា.

១៥១. ‘‘អភិភោន្តិ ន តស្សាភា, ចន្ទសូរា សតារកា;

សមន្តា យោជនសតេ, បទីបោបិ ន បជ្ជលិ.

១៥២. ‘‘តេន កាលេន យេ កេចិ, ថូបំ បូជេន្តិ មានុសា;

ន តេ ថូបំ អារុហន្តិ, អម្ពរេ ឧក្ខិបន្តិ តេ.

១៥៣. ‘‘ទេវេហិ ឋបិតោ យក្ខោ, អភិសម្មតនាមកោ;

ធជំ វា បុប្ផទាមំ វា, អភិរោបេតិ ឧត្តរិំ.

១៥៤. ‘‘ន តេ បស្សន្តិ តំ យក្ខំ, ទាមំ បស្សន្តិ គច្ឆតោ;

ឯវំ បស្សិត្វា គច្ឆន្តា, សព្ពេ គច្ឆន្តិ សុគ្គតិំ.

១៥៥. ‘‘វិរុទ្ធា យេ បាវចនេ, បសន្នា យេ ច សាសនេ;

បាដិហីរំ ទដ្ឋុកាមា, ថូបំ បូជេន្តិ មានុសា.

១៥៦. ‘‘នគរេ ហំសវតិយា, អហោសិំ ភតកោ តទា;

អាមោទិតំ ជនំ ទិស្វា, ឯវំ ចិន្តេសហំ តទា.

១៥៧. ‘‘‘ឧឡារោ ភគវា នេសោ, យស្ស ធាតុឃរេ ទិសំ;

ឥមា ច ជនតា តុដ្ឋា, ការំ កុព្ពំ ន តប្បរេ.

១៥៨. ‘‘‘អហម្បិ ការំ កស្សាមិ, លោកនាថស្ស តាទិនោ;

តស្ស ធម្មេសុ ទាយាទោ, ភវិស្សាមិ អនាគតេ’.

១៥៩. ‘‘សុធោតំ រជកេនាហំ, ឧត្តរេយ្យំ បដំ មម;

វេឡគ្គេ អាលគ្គេត្វាន, ធជំ ឧក្ខិបិមម្ពរេ.

១៦០. ‘‘អភិសម្មតកោ គយ្ហ, អម្ពរេ ហាសិ មេ ធជំ;

វាតេរិតំ ធជំ ទិស្វា, ភិយ្យោ ហាសំ ជនេសហំ.

១៦១. ‘‘តត្ថ ចិត្តំ បសាទេត្វា, សមណំ ឧបសង្កមិំ;

តំ ភិក្ខុំ អភិវាទេត្វា, វិបាកំ បុច្ឆហំ ធជេ.

១៦២. ‘‘សោ មេ កថេសិ អានន្ទី, បីតិសញ្ជននំ មម;

‘តស្ស ធជស្ស វិបាកំ, អនុភោស្សសិ សព្ពទា.

១៦៣. ‘‘‘ហត្ថិអស្សរថាបត្តី, សេនា ច ចតុរង្គិនី;

បរិវារេស្សន្តិ តំ និច្ចំ, ធជទានស្សិទំ ផលំ.

១៦៤. ‘‘‘សដ្ឋិតុរិយសហស្សានិ, ភេរិយោ សមលង្កតា;

បរិវារេស្សន្តិ តំ និច្ចំ, ធជទានស្សិទំ ផលំ.

១៦៥. ‘‘‘ឆឡសីតិសហស្សានិ, នារិយោ សមលង្កតា;

វិចិត្តវត្ថាភរណា, អាមុក្កមណិកុណ្ឌលា.

១៦៦. ‘‘‘អាឡារបម្ហា ហសុលា, សុសញ្ញា [សុត្ថនា (សី.) អប. ថេរ ២.៤៨.១៩ មណិបូជកត្ថេរាបទានេបិ] តនុមជ្ឈិមា;

បរិវារេស្សន្តិ តំ និច្ចំ, ធជទានស្សិទំ ផលំ.

១៦៧. ‘‘‘តិំសកប្បសហស្សានិ, ទេវលោកេ រមិស្សសិ;

អសីតិក្ខត្តុំ ទេវិន្ទោ, ទេវរជ្ជំ ករិស្សសិ.

១៦៨. ‘‘‘សហស្សក្ខត្តុំ រាជា ច, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

១៦៩. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១៧០. ‘‘‘ទេវលោកា ចវិត្វាន, សុក្កមូលេន ចោទិតោ;

បុញ្ញកម្មេន សញ្ញុត្តោ, ព្រហ្មពន្ធុ ភវិស្សសិ.

១៧១. ‘‘‘អសីតិកោដិំ ឆឌ្ឌេត្វា, ទាសេ កម្មករេ ពហូ;

គោតមស្ស ភគវតោ, សាសនេ បព្ពជិស្សសិ.

១៧២. ‘‘‘អារាធយិត្វា សម្ពុទ្ធំ, គោតមំ សក្យបុង្គវំ;

ឧបវានោតិ នាមេន, ហេស្សសិ សត្ថុ សាវកោ’.

១៧៣. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

សុមុត្តោ សរវេគោវ, កិលេសេ ឈាបយិំ [កិលេសា ឈាបិតា (សី.)] មម.

១៧៤. ‘‘ចក្កវត្តិស្ស សន្តស្ស, ចាតុទ្ទីបិស្សរស្ស មេ;

តីណិ យោជនានិ សាមន្តា, ឧស្សីយន្តិ ធជា សទា.

១៧៥. ‘‘សតសហស្សិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ធជទានស្សិទំ ផលំ.

១៧៦. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៧៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៧៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបវានត្ថេរោ ឥមា គាថាយោ

អភាសិត្ថាតិ.

ឧបវានត្ថេរស្សាបទានំ ទសមំ.