៩. អាមណ្ឌផលទាយកត្ថេរអបទានំ

៧៤. ‘‘បទុមុត្តរោ នាម ជិនោ, សព្ពធម្មាន បារគូ;

វុដ្ឋហិត្វា សមាធិម្ហា, ចង្កមី លោកនាយកោ.

៧៥. ‘‘ខារិភារំ គហេត្វាន, អាហរន្តោ ផលំ តទា;

អទ្ទសំ វិរជំ ពុទ្ធំ, ចង្កមន្តំ មហាមុនិំ.

៧៦. ‘‘បសន្នចិត្តោ សុមនោ, សិរេ កត្វាន អញ្ជលិំ;

សម្ពុទ្ធំ អភិវាទេត្វា, អាមណ្ឌមទទិំ ផលំ.

៧៧. ‘‘សតសហស្សិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, អាមណ្ឌស្ស ឥទំ ផលំ.

៧៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អាមណ្ឌផលទាយកោ ថេរោ ឥមា

គាថាយោ អភាសិត្ថាតិ.

អាមណ្ឌផលទាយកត្ថេរស្សាបទានំ នវមំ.