១០. សុគន្ធត្ថេរអបទានំ

៨១. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន [នាមេន (សព្ពត្ថ)], ឧប្បជ្ជិ វទតំ វរោ.

៨២. ‘‘អនុព្យញ្ជនសម្បន្នោ, ពាត្តិំសវរលក្ខណោ;

ព្យាមប្បភាបរិវុតោ, រំសិជាលសមោត្ថដោ [រំសិជាលសមោសដោ (សី. បី.)].

៨៣. ‘‘អស្សាសេតា យថា ចន្ទោ, សូរិយោវ បភង្ករោ;

និព្ពាបេតា យថា មេឃោ, សាគរោវ គុណាករោ.

៨៤. ‘‘ធរណីរិវ សីលេន, ហិមវាវ សមាធិនា;

អាកាសោ វិយ បញ្ញាយ, អសង្គោ អនិលោ យថា.

៨៥. ‘‘ស កទាចិ មហាវីរោ, បរិសាសុ វិសារទោ;

សច្ចានិ សម្បកាសេតិ, ឧទ្ធរន្តោ មហាជនំ.

៨៦. ‘‘តទា ហិ ពារាណសិយំ, សេដ្ឋិបុត្តោ មហាយសោ;

អាសហំ ធនធញ្ញស្ស [អនន្តធនធញ្ញស្ស (ក.)], បហូតស្ស ពហូ តទា.

៨៧. ‘‘ជង្ឃាវិហារំ វិចរំ, មិគទាយមុបេច្ចហំ [មុបេសហំ (ក.)];

អទ្ទសំ វិរជំ ពុទ្ធំ, ទេសេន្តំ អមតំ បទំ.

៨៨. ‘‘វិសដ្ឋកន្តវចនំ, ករវីកសមស្សរំ;

ហំសរុតេហិ [ហំសទុន្ទុភិ (ស្យា. បី.)] និគ្ឃោសំ, វិញ្ញាបេន្តំ មហាជនំ.

៨៩. ‘‘ទិស្វា ទេវាតិទេវំ តំ, សុត្វាវ មធុរំ គិរំ;

បហាយនប្បកេ ភោគេ, បព្ពជិំ អនគារិយំ.

៩០. ‘‘ឯវំ បព្ពជិតោ ចាហំ, ន ចិរេន ពហុស្សុតោ;

អហោសិំ ធម្មកថិកោ, វិចិត្តបដិភាណវា.

៩១. ‘‘មហាបរិសមជ្ឈេហំ, ហដ្ឋចិត្តោ បុនប្បុនំ;

វណ្ណយិំ ហេមវណ្ណស្ស, វណ្ណំ វណ្ណវិសារទោ.

៩២. ‘‘ឯស ខីណាសវោ ពុទ្ធោ, អនីឃោ ឆិន្នសំសយោ;

សព្ពកម្មក្ខយំ បត្តោ, វិមុត្តោបធិសង្ខយេ.

៩៣. ‘‘ឯស សោ ភគវា ពុទ្ធោ, ឯស សីហោ អនុត្តរោ;

សទេវកស្ស លោកស្ស, ព្រហ្មចក្កប្បវត្តកោ.

៩៤. ‘‘ទន្តោ ទមេតា សន្តោ ច, សមេតា និព្ពុតោ ឥសិ;

និព្ពាបេតា ច អស្សត្ថោ, អស្សាសេតា មហាជនំ.

៩៥. ‘‘វីរោ សូរោ ច វិក្កន្តោ [ធីរោ ច (សី. បី.)], បញ្ញោ ការុណិកោ វសី;

វិជិតាវី ច ស ជិនោ, អប្បគព្ពោ អនាលយោ.

៩៦. ‘‘អនេញ្ជោ អចលោ ធីមា, អមោហោ អសមោ មុនិ;

ធោរយ្ហោ ឧសភោ នាគោ, សីហោ សក្កោ គរូសុបិ.

៩៧. ‘‘វិរាគោ វិមលោ ព្រហ្មា, វាទី សូរោ រណញ្ជហោ;

អខិលោ ច វិសល្លោ ច, អសមោ សំយតោ [វុសភោ (ស្យា.), បយតោ (បី.)] សុចិ.

៩៨. ‘‘ព្រាហ្មណោ សមណោ នាថោ, ភិសក្កោ សល្លកត្តកោ;

យោធោ ពុទ្ធោ សុតាសុតោ [សុតោ សុតោ (សី. បី.)], អចលោ មុទិតោ សិតោ [ទិតោ (សី.)].

៩៩. ‘‘ធាតា ធតា ច សន្តិ ច, កត្តា នេតា បកាសិតា;

សម្បហំសិតា ភេត្តា ច, ឆេត្តា សោតា បសំសិតា.

១០០. ‘‘អខិលោ ច វិសល្លោ ច, អនីឃោ អកថំកថី;

អនេជោ វិរជោ កត្តា, គន្ធា វត្តា បសំសិតា.

១០១. ‘‘តារេតា អត្ថការេតា, ការេតា សម្បទារិតា;

បាបេតា សហិតា កន្តា, ហន្តា អាតាបី តាបសោ [ហន្តា, តាបិតា ច វិសោសិតា (ស្យា.)].

១០២. ‘‘សមចិត្តោ [សច្ចដ្ឋិតោ (ស្យា.)] សមសមោ, អសហាយោ ទយាលយោ [ទយាសយោ (សី.)];

អច្ឆេរសត្តោ [អច្ឆេរមន្តោ (ស្យា.)] អកុហោ, កតាវី ឥសិសត្តមោ.

១០៣. ‘‘និត្តិណ្ណកង្ខោ និម្មានោ, អប្បមេយ្យោ អនូបមោ;

សព្ពវាក្យបថាតីតោ, សច្ច នេយ្យន្តគូ [សព្ពនេយ្យន្តិកោ (ស្យា.)] ជិនោ.

១០៤. ‘‘សត្តសារវរេ [សតរំសីវរេ (ស្យា.)] តស្មិំ, បសាទោ អមតាវហោ;

តស្មា ពុទ្ធេ ច ធម្មេ ច, សង្ឃេ សទ្ធា មហត្ថិកា [មហិទ្ធិកា (សី. ក.)].

១០៥. ‘‘គុណេហិ ឯវមាទីហិ, តិលោកសរណុត្តមំ;

វណ្ណេន្តោ បរិសាមជ្ឈេ, អកំ [កថិំ (ស្យា.)] ធម្មកថំ អហំ.

១០៦. ‘‘តតោ ចុតាហំ តុសិតេ, អនុភោត្វា មហាសុខំ;

តតោ ចុតោ មនុស្សេសុ, ជាតោ ហោមិ សុគន្ធិកោ.

១០៧. ‘‘និស្សាសោ មុខគន្ធោ ច, ទេហគន្ធោ តថេវ មេ;

សេទគន្ធោ ច សតតំ, សព្ពគន្ធោវ ហោតិ មេ [សព្ពគន្ធោតិសេតិ មេ (សី. បី.)].

១០៨. ‘‘មុខគន្ធោ សទា មយ្ហំ, បទុមុប្បលចម្បកោ;

បរិសន្តោ [អាទិសន្តោ (សី.), អតិកន្តោ (ស្យា.), អតិសន្តោ (បី.)] សទា វាតិ, សរីរោ ច តថេវ មេ.

១០៩. ‘‘គុណត្ថវស្ស សព្ពន្តំ, ផលំ តុ [ផលន្តំ (ស្យា.)] បរមព្ភុតំ;

ឯកគ្គមនសា សព្ពេ, វណ្ណយិស្សំ [ភាសិតស្ស (ស្យា.)] សុណាថ មេ.

១១០. ‘‘គុណំ ពុទ្ធស្ស វត្វាន, ហិតាយ ច ន សទិសំ [ហិតាយ ជនសន្ធិសុ (សី. បី.), ហិតាយ នំ សុខាវហំ (ស្យា.)];

សុខិតោ [សុចិត្តោ (ស្យា.)] ហោមិ សព្ពត្ថ, សង្ឃោ វីរសមាយុតោ [សរទ្ធនិសមាយុតោ (សី.)].

១១១. ‘‘យសស្សី សុខិតោ កន្តោ, ជុតិមា បិយទស្សនោ;

វត្តា អបរិភូតោ ច, និទ្ទោសោ បញ្ញវា តថា.

១១២. ‘‘ខីណេ អាយុសិ [បាសុសិ (ស្យា.)] និព្ពានំ, សុលភំ ពុទ្ធភត្តិនោ;

តេសំ ហេតុំ បវក្ខាមិ, តំ សុណាថ យថាតថំ.

១១៣. ‘‘សន្តំ យសំ ភគវតោ, វិធិនា អភិវាទយំ;

តត្ថ តត្ថូបបន្នោបិ [យត្ថ តត្ថូបបន្នោបិ (សី. បី.)], យសស្សី តេន ហោមហំ.

១១៤. ‘‘ទុក្ខស្សន្តករំ ពុទ្ធំ, ធម្មំ សន្តមសង្ខតំ;

វណ្ណយំ សុខទោ អាសិំ, សត្តានំ សុខិតោ តតោ.

១១៥. ‘‘គុណំ វទន្តោ ពុទ្ធស្ស, ពុទ្ធបីតិសមាយុតោ;

សកន្តិំ បរកន្តិញ្ច, ជនយិំ តេន កន្តិមា.

១១៦. ‘‘ជិនោ តេ តិត្ថិកាកិណ្ណេ [ជនោឃេ តិត្ថកាកិណ្ណេ (សី. បី.), ជិនោ យោ តិត្ថិកាតិណ្ណោ (ស្យា.)], អភិភុយ្យ កុតិត្ថិយេ;

គុណំ វទន្តោ ជោតេសិំ [ថោមេសិំ (ស្យា.)], នាយកំ ជុតិមា តតោ.

១១៧. ‘‘បិយការី ជនស្សាបិ, សម្ពុទ្ធស្ស គុណំ វទំ;

សរទោវ សសង្កោហំ, តេនាសិំ បិយទស្សនោ.

១១៨. ‘‘យថាសត្តិវសេនាហំ, សព្ពវាចាហិ សន្ថវិំ;

សុគតំ តេន វាគិសោ, វិចិត្តបដិភានវា.

១១៩. ‘‘យេ ពាលា វិមតិំ បត្តា, បរិភោន្តិ មហាមុនិំ;

និគ្គហិំ តេ សទ្ធម្មេន, បរិភូតោ ន តេនហំ [បរិភូតេន តេនហំ (ស្យា.)].

១២០. ‘‘ពុទ្ធវណ្ណេន សត្តានំ, កិលេសេ អបនេសហំ;

និក្កិលេសមនោ ហោមិ, តស្ស កម្មស្ស វាហសា.

១២១. ‘‘សោតូនំ វុទ្ធិមជនិំ [ពុទ្ធិមជនិំ (សី. បី.)], ពុទ្ធានុស្សតិទេសកោ;

តេនាហមាសិំ [តេនាបិ ចាសិំ (ស្យា.)] សប្បញ្ញោ, និបុណត្ថវិបស្សកោ.

១២២. ‘‘សព្ពាសវបរិក្ខីណោ, តិណ្ណសំសារសាគរោ;

សិខីវ អនុបាទានោ, បាបុណិស្សាមិ និព្ពុតិំ.

១២៣. ‘‘ឥមស្មិំយេវ កប្បស្មិំ, យមហំ សន្ថវិំ ជិនំ;

ទុគ្គតិំ នាភិជានាមិ, ពុទ្ធវណ្ណស្សិទំ ផលំ.

១២៤. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១២៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុគន្ធោ ថេរោ ឥមា គាថាយោ

អភាសិត្ថាតិ.

សុគន្ធត្ថេរស្សាបទានំ ទសមំ.

តិណទាយកវគ្គោ តេបញ្ញាសមោ.