៨. ពោធិសម្មជ្ជកត្ថេរអបទានំ

៤៨. ‘‘អហំ បុរេ ពោធិបត្តំ, ឧជ្ឈិតំ ចេតិយង្គណេ;

តំ គហេត្វាន ឆឌ្ឌេសិំ, អលភិំ វីសតីគុណេ.

៤៩. ‘‘តស្ស កម្មស្ស តេជេន, សំសរន្តោ ភវាភវេ;

ទុវេ ភវេ សំសរាមិ, ទេវត្តេ ចាបិ មានុសេ.

៥០. ‘‘ទេវលោកា ចវិត្វាន, អាគន្ត្វា មានុសំ ភវំ;

ទុវេ កុលេ បជាយាមិ, ខត្តិយេ ចាបិ ព្រាហ្មណេ.

៥១. ‘‘អង្គបច្ចង្គសម្បន្នោ, អារោហបរិណាហវា;

អភិរូបោ សុចិ ហោមិ, សម្បុណ្ណង្គោ អនូនកោ.

៥២. ‘‘ទេវលោកេ មនុស្សេ វា, ជាតោ វា យត្ថ កត្ថចិ;

ភវេ សុវណ្ណវណ្ណោ ច, ឧត្តត្តកនកូបមោ.

៥៣. ‘‘មុទុកា មទ្ទវា ស្និទ្ធា [មុទុ មទ្ទវា សិនិទ្ធា (ស្យា.)], សុខុមា សុកុមារិកា;

ឆវិ មេ សព្ពទា ហោតិ, ពោធិបត្តេ សុឆឌ្ឌិតេ [សុឆឌ្ឌិនេ (សី.)].

៥៤. ‘‘យតោ កុតោចិ គតីសុ, សរីរេ សមុទាគតេ;

ន លិម្បតិ រជោជល្លំ, វិបាកោ បត្តឆឌ្ឌិតេ.

៥៥. ‘‘ឧណ្ហេ វាតាតបេ តស្ស, អគ្គិតាបេន វា បន;

គត្តេ សេទា ន មុច្ចន្តិ, វិបាកោ បត្តឆឌ្ឌិតេ.

៥៦. ‘‘កុដ្ឋំ គណ្ឌោ កិលាសោ ច, តិលកា បិឡកា តថា;

ន ហោន្តិ កាយេ ទទ្ទុ ច, វិបាកោ បត្តឆឌ្ឌិតេ.

៥៧. ‘‘អបរម្បិ គុណំ តស្ស, និព្ពត្តតិ ភវាភវេ;

រោគា ន ហោន្តិ កាយស្មិំ, វិបាកោ បត្តឆឌ្ឌិតេ.

៥៨. ‘‘អបរម្បិ គុណំ តស្ស, និព្ពត្តតិ ភវាភវេ;

ន ហោតិ ចិត្តជា បីឡា, វិបាកោ បត្តឆឌ្ឌិតេ.

៥៩. ‘‘អបរម្បិ គុណំ តស្ស, និព្ពត្តតិ ភវាភវេ;

អមិត្តា ន ភវន្តស្ស, វិបាកោ បត្តឆឌ្ឌិតេ.

៦០. ‘‘អបរម្បិ គុណំ តស្ស, និព្ពត្តតិ ភវាភវេ;

អនូនភោគោ ភវតិ, វិបាកោ បត្តឆឌ្ឌិតេ.

៦១. ‘‘អបរម្បិ គុណំ តស្ស, និព្ពត្តតិ ភវាភវេ;

អគ្គិរាជូហិ ចោរេហិ, ន ហោតិ ឧទកេ ភយំ.

៦២. ‘‘អបរម្បិ គុណំ តស្ស, និព្ពត្តតិ ភវាភវេ;

ទាសិទាសា អនុចរា, ហោន្តិ ចិត្តានុវត្តកា.

៦៣. ‘‘យម្ហិ អាយុប្បមាណម្ហិ, ជាយតេ មានុសេ ភវេ;

តតោ ន ហាយតេ អាយុ, តិដ្ឋតេ យាវតាយុកំ.

៦៤. ‘‘អព្ភន្តរា ច ពាហិរា [ពហិចរា (សី. បី. ក.)], នេគមា ច សរដ្ឋកា;

នុយុត្តា ហោន្តិ សព្ពេបិ, វុទ្ធិកាមា សុខិច្ឆកា.

៦៥. ‘‘ភោគវា យសវា ហោមិ, សិរិមា ញាតិបក្ខវា;

អបេតភយសន្តាសោ, ភវេហំ សព្ពតោ ភវេ.

៦៦. ‘‘ទេវា មនុស្សា អសុរា, គន្ធព្ពា យក្ខរក្ខសា;

សព្ពេ តេ បរិរក្ខន្តិ, ភវេ សំសរតោ សទា.

៦៧. ‘‘ទេវលោកេ មនុស្សេ ច, អនុភោត្វា ឧភោ យសេ;

អវសានេ ច និព្ពានំ, សិវំ បត្តោ អនុត្តរំ.

៦៨. ‘‘សម្ពុទ្ធមុទ្ទិសិត្វាន, ពោធិំ វា តស្ស សត្ថុនោ;

យោ បុញ្ញំ បសវេ បោសោ, តស្ស កិំ នាម ទុល្លភំ.

៦៩. ‘‘មគ្គេ ផលេ អាគមេ ច, ឈានាភិញ្ញាគុណេសុ ច;

អញ្ញេសំ អធិកោ ហុត្វា, និព្ពាយាមិ អនាសវោ.

៧០. ‘‘បុរេហំ ពោធិយា បត្តំ, ឆឌ្ឌេត្វា ហដ្ឋមានសោ;

ឥមេហិ វីសតង្គេហិ, សមង្គី ហោមិ សព្ពទា.

៧១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៧៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពោធិសម្មជ្ជកោ ថេរោ ឥមា គាថាយោ

អភាសិត្ថាតិ.

ពោធិសម្មជ្ជកត្ថេរស្សាបទានំ អដ្ឋមំ.