១. តិណមុដ្ឋិទាយកត្ថេរអបទានំ

១. ‘‘ហិមវន្តស្សាវិទូរេ, លម្ពកោ នាម បព្ពតោ;

តត្ថេវ តិស្សោ [តត្ថោបតិស្សោ (សី. បី. ក.)] សម្ពុទ្ធោ, អព្ភោកាសម្ហិ ចង្កមិ.

២. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

ទិស្វាន តំ ទេវទេវំ, តិណមុដ្ឋិមទាសហំ.

៣. ‘‘និសីទនត្ថំ ពុទ្ធស្ស, ទត្វា ចិត្តំ បសាទយិំ;

សម្ពុទ្ធំ អភិវាទេត្វា, បក្កាមិំ [បក្កមិំ (ក.)] ឧត្តរាមុខោ.

៤. ‘‘អចិរំ គតមត្តស្ស [គតមត្តំ មំ (សី. ស្យា.)], មិគរាជា អបោថយិ [អហេឋយិ (សី. ស្យា. បី.)];

សីហេន បោថិតោ [បាតិតោ (សី. បី.), ឃាដិតោ (ស្យា.)] សន្តោ, តត្ថ កាលង្កតោ អហំ.

៥. ‘‘អាសន្នេ មេ កតំ កម្មំ, ពុទ្ធសេដ្ឋេ អនាសវេ;

សុមុត្តោ សរវេគោវ, ទេវលោកមគច្ឆហំ.

៦. ‘‘យូបោ តត្ថ សុភោ អាសិ, បុញ្ញកម្មាភិនិម្មិតោ;

សហស្សកណ្ឌោ សតភេណ្ឌុ, ធជាលុ ហរិតាមយោ.

៧. ‘‘បភា និទ្ធាវតេ តស្ស, សតរំសីវ ឧគ្គតោ;

អាកិណ្ណោ ទេវកញ្ញាហិ, អាមោទិំ កាមកាមិហំ.

៨. ‘‘ទេវលោកា ចវិត្វាន, សុក្កមូលេន ចោទិតោ;

អាគន្ត្វាន មនុស្សត្តំ, បត្តោម្ហិ អាសវក្ខយំ.

៩. ‘‘ចតុន្នវុតិតោ កប្បេ, និសីទនមទាសហំ;

ទុគ្គតិំ នាភិជានាមិ, តិណមុដ្ឋេ ឥទំ ផលំ.

១០. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

១១. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

១២. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា តិណមុដ្ឋិទាយកោ ថេរោ ឥមា គាថាយោ

អភាសិត្ថាតិ.

តិណមុដ្ឋិទាយកត្ថេរស្សាបទានំ បឋមំ.