៩. តាលផលទាយកត្ថេរអបទានំ

៨៥. ‘‘សតរំសី នាម ភគវា, សយម្ភូ អបរាជិតោ;

វិវេកា វុដ្ឋហិត្វាន, គោចរាយាភិនិក្ខមិ.

៨៦. ‘‘ផលហត្ថោ អហំ ទិស្វា, ឧបគច្ឆិំ នរាសភំ;

បសន្នចិត្តោ សុមនោ, តាលផលំ អទាសហំ.

៨៧. ‘‘ចតុន្នវុតិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៨៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៨៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៩០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តាលផលទាយកោ ថេរោ ឥមា គាថាយោ

អភាសិត្ថាតិ.

តាលផលទាយកត្ថេរស្សាបទានំ នវមំ.