៧. អជេលិផលទាយកត្ថេរអបទានំ

៧៤. ‘‘អជ្ជុនោ [អជិនោ (ស្យា.)] នាម សម្ពុទ្ធោ, ហិមវន្តេ វសី តទា;

ចរណេន ច សម្បន្នោ, សមាធិកុសលោ មុនិ.

៧៥. ‘‘កុម្ភមត្តំ គហេត្វាន, អជេលិំ [អញ្ជលិំ (ស្យា.), អជេលំ (បី.)] ជីវជីវកំ;

ឆត្តបណ្ណំ គហេត្វាន, អទាសិំ សត្ថុនោ អហំ.

៧៦. ‘‘ចតុន្នវុតិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៧៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៧៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អជេលិផលទាយកោ ថេរោ ឥមា

គាថាយោ អភាសិត្ថាតិ.

អជេលិផលទាយកត្ថេរស្សាបទានំ សត្តមំ.