២. ឯកបត្តទាយកត្ថេរអបទានំ

៣៩. ‘‘នគរេ ហំសវតិយា, កុម្ភការោ អហោសហំ;

អទ្ទសំ វិរជំ ពុទ្ធំ, ឱឃតិណ្ណមនាសវំ.

៤០. ‘‘សុកតំ មត្តិកាបត្តំ, ពុទ្ធសេដ្ឋស្សទាសហំ;

បត្តំ ទត្វា ភគវតោ, ឧជុភូតស្ស តាទិនោ.

៤១. ‘‘ភវេ និព្ពត្តមានោហំ, សោណ្ណថាលេ លភាមហំ;

រូបិមយេ ច សោវណ្ណេ, តដ្ដិកេ ច មណីមយេ.

៤២. ‘‘បាតិយោ បរិភុញ្ជាមិ, បុញ្ញកម្មស្សិទំ ផលំ;

យសានញ្ច ធនានញ្ច [យសសាវ ជនានញ្ច (ស្យា.)], អគ្គភូតោ [បត្តភូតោ (សី. បី.)] ច ហោមហំ.

៤៣. ‘‘យថាបិ ភទ្ទកេ ខេត្តេ, ពីជំ អប្បម្បិ រោបិតំ;

សម្មាធារំ បវច្ឆន្តេ, ផលំ តោសេតិ កស្សកំ.

៤៤. ‘‘តថេវិទំ បត្តទានំ, ពុទ្ធខេត្តម្ហិ រោបិតំ;

បីតិធារេ បវស្សន្តេ, ផលំ មំ តោសយិស្សតិ.

៤៥. ‘‘យាវតា ខេត្តា វិជ្ជន្តិ, សង្ឃាបិ ច គណាបិ ច;

ពុទ្ធខេត្តសមោ នត្ថិ, សុខទោ សព្ពបាណិនំ.

៤៦. ‘‘នមោ តេ បុរិសាជញ្ញ, នមោ តេ បុរិសុត្តម;

ឯកបត្តំ ទទិត្វាន, បត្តោម្ហិ អចលំ បទំ.

៤៧. ‘‘ឯកនវុតិតោ កប្បេ, យំ បត្តមទទិំ តទា;

ទុគ្គតិំ នាភិជានាមិ, បត្តទានស្សិទំ ផលំ.

៤៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកបត្តទាយកោ ថេរោ ឥមា គាថាយោ

អភាសិត្ថាតិ.

ឯកបត្តទាយកត្ថេរស្សាបទានំ ទុតិយំ.