៨. បុលិនថូបិយត្ថេរអបទានំ

៥៧. ‘‘ហិមវន្តស្សាវិទូរេ, យមកោ នាម បព្ពតោ;

អស្សមោ សុកតោ មយ្ហំ, បណ្ណសាលា សុមាបិតា.

៥៨. ‘‘នារទោ នាម នាមេន, ជដិលោ ឧគ្គតាបនោ;

ចតុទ្ទសសហស្សានិ, សិស្សា បរិចរន្តិ មំ.

៥៩. ‘‘បដិសល្លីនកោ សន្តោ, ឯវំ ចិន្តេសហំ តទា;

‘សព្ពោ ជនោ មំ បូជេតិ, នាហំ បូជេមិ កិញ្ចនំ.

៦០. ‘‘‘ន មេ ឱវាទកោ អត្ថិ, វត្តា កោចិ ន វិជ្ជតិ;

អនាចរិយុបជ្ឈាយោ, វនេ វាសំ ឧបេមហំ.

៦១. ‘‘‘ឧបាសមានោ យមហំ, គរុចិត្តំ ឧបដ្ឋហេ;

សោ មេ អាចរិយោ នត្ថិ, វនវាសោ និរត្ថកោ.

៦២. ‘‘‘អាយាគំ មេ គវេសិស្សំ, គរុំ ភាវនិយំ តថា;

សាវស្សយោ វសិស្សាមិ, ន កោចិ គរហិស្សតិ’.

៦៣. ‘‘ឧត្តានកូលា នទិកា, សុបតិត្ថា មនោរមា;

សំសុទ្ធបុលិនាកិណ្ណា, អវិទូរេ មមស្សមំ.

៦៤. ‘‘នទិំ អមរិកំ នាម, ឧបគន្ត្វានហំ តទា;

សំវឌ្ឍយិត្វា បុលិនំ, អកំ បុលិនចេតិយំ.

៦៥. ‘‘យេ តេ អហេសុំ សម្ពុទ្ធា, ភវន្តករណា មុនី;

តេសំ ឯតាទិសោ ថូបោ, តំ និមិត្តំ ករោមហំ.

៦៦. ‘‘ករិត្វា បុលិនំ [បុឡិនេ (សី. ស្យា. បី.)] ថូបំ, សោវណ្ណំ មាបយិំ អហំ;

សោណ្ណកិង្កណិបុប្ផានិ, សហស្សេ តីណិ បូជយិំ.

៦៧. ‘‘សាយបាតំ នមស្សាមិ, វេទជាតោ កតញ្ជលី;

សម្មុខា វិយ សម្ពុទ្ធំ, វន្ទិំ បុលិនចេតិយំ.

៦៨. ‘‘យទា កិលេសា ជាយន្តិ, វិតក្កា គេហនិស្សិតា;

សរាមិ សុកតំ ថូបំ, បច្ចវេក្ខាមិ តាវទេ.

៦៩. ‘‘ឧបនិស្សាយ វិហរំ, សត្ថវាហំ វិនាយកំ;

កិលេសេ សំវសេយ្យាសិ, ន យុត្តំ តវ មារិស.

៧០. ‘‘សហ អាវជ្ជិតេ ថូបេ, គារវំ ហោតិ មេ តទា;

កុវិតក្កេ វិនោទេសិំ, នាគោ តុត្តដ្ដិតោ យថា.

៧១. ‘‘ឯវំ វិហរមានំ មំ, មច្ចុរាជាភិមទ្ទថ;

តត្ថ កាលង្កតោ សន្តោ, ព្រហ្មលោកមគច្ឆហំ.

៧២. ‘‘យាវតាយុំ វសិត្វាន, តិទិវេ [តិទសេ (សី. បី.)] ឧបបជ្ជហំ;

អសីតិក្ខត្តុំ ទេវិន្ទោ, ទេវរជ្ជមការយិំ.

៧៣. ‘‘សតានំ តីណិក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

៧៤. ‘‘សោណ្ណកិង្កណិបុប្ផានំ [តេសំ កិង្កណិបុប្ផានំ (សី.)], វិបាកំ អនុភោមហំ;

ធាតីសតសហស្សានិ, បរិវារេន្តិ មំ [មេ (ក.)] ភវេ.

៧៥. ‘‘ថូបស្ស បរិចិណ្ណត្តា, រជោជល្លំ ន លិម្បតិ;

គត្តេ សេទា ន មុច្ចន្តិ, សុប្បភាសោ ភវាមហំ.

៧៦. ‘‘អហោ មេ សុកតោ ថូបោ, សុទិដ្ឋាមរិកា នទី;

ថូបំ កត្វាន បុលិនំ, បត្តោម្ហិ អចលំ បទំ.

៧៧. ‘‘កុសលំ កត្តុកាមេន, ជន្តុនា សារគាហិនា;

នត្ថិ ខេត្តំ អខេត្តំ វា, បដិបត្តីវ សាធកា [សារិកា (បី.), សារកា (ស្យា.), សារតា (ក.)].

៧៨. ‘‘យថាបិ ពលវា បោសោ, អណ្ណវំ តរិតុស្សហេ;

បរិត្តំ កដ្ឋមាទាយ, បក្ខន្ទេយ្យ មហាសរំ.

៧៩. ‘‘ឥមាហំ កដ្ឋំ និស្សាយ, តរិស្សាមិ មហោទធិំ;

ឧស្សាហេន វីរិយេន, តរេយ្យ ឧទធិំ នរោ.

៨០. ‘‘តថេវ មេ កតំ កម្មំ, បរិត្តំ ថោកកញ្ច យំ;

តំ កម្មំ ឧបនិស្សាយ, សំសារំ សមតិក្កមិំ.

៨១. ‘‘បច្ឆិមេ ភវេ សម្បត្តេ, សុក្កមូលេន ចោទិតោ;

សាវត្ថិយំ បុរេ ជាតោ, មហាសាលេ សុអឌ្ឍកេ.

៨២. ‘‘សទ្ធា មាតា បិតា មយ្ហំ, ពុទ្ធស្ស សរណំ គតា;

ឧភោ ទិដ្ឋបទា ឯតេ, អនុវត្តន្តិ សាសនំ.

៨៣. ‘‘ពោធិបបដិកំ គយ្ហ, សោណ្ណថូបមការយុំ;

សាយបាតំ [សាយំ បាតំ (ស្យា. ក.)] នមស្សន្តិ, សក្យបុត្តស្ស សម្មុខា.

៨៤. ‘‘ឧបោសថម្ហិ ទិវសេ, សោណ្ណថូបំ វិនីហរុំ;

ពុទ្ធស្ស វណ្ណំ កិត្តេន្តា, តិយាមំ វីតិនាមយុំ.

៨៥. ‘‘សហ ទិស្វានហំ [បសាទេត្វានហំ (ក.)] ថូបំ, សរិំ បុលិនចេតិយំ;

ឯកាសនេ និសីទិត្វា, អរហត្តមបាបុណិំ.

ទ្វាវីសតិមំ ភាណវារំ.

៨៦. ‘‘គវេសមានោ តំ វីរំ, ធម្មសេនាបតិទ្ទសំ;

អគារា និក្ខមិត្វាន, បព្ពជិំ តស្ស សន្តិកេ.

៨៧. ‘‘ជាតិយា សត្តវស្សេន, អរហត្តមបាបុណិំ;

ឧបសម្បាទយី ពុទ្ធោ, គុណមញ្ញាយ ចក្ខុមា.

៨៨. ‘‘ទារកេនេវ សន្តេន, កិរិយំ និដ្ឋិតំ មយា;

កតំ មេ ករណីយជ្ជ, សក្យបុត្តស្ស សាសនេ.

៨៩. ‘‘សព្ពវេរភយាតីតោ, សព្ពសង្គាតិគោ [សព្ពសង្កាតិតោ (ក.)] ឥសិ;

សាវកោ តេ មហាវីរ, សោណ្ណថូបស្សិទំ ផលំ.

៩០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៩១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៩២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុលិនថូបិយោ ថេរោ ឥមា គាថាយោ

អភាសិត្ថាតិ.

បុលិនថូបិយត្ថេរស្សាបទានំ អដ្ឋមំ.