៣. កោរណ្ឌបុប្ផិយត្ថេរអបទានំ

១៥. ‘‘វនកម្មិកោ បុរេ អាសិំ, បិតុមាតុមតេនហំ [បិតុបេតាមហេនហំ (សី. ស្យា. បី.)];

បសុមារេន ជីវាមិ, កុសលំ មេ ន វិជ្ជតិ.

១៦. ‘‘មម អាសយសាមន្តា, តិស្សោ លោកគ្គនាយកោ;

បទានិ តីណិ ទស្សេសិ, អនុកម្បាយ ចក្ខុមា.

១៧. ‘‘អក្កន្តេ ច បទេ ទិស្វា, តិស្សនាមស្ស សត្ថុនោ;

ហដ្ឋោ ហដ្ឋេន ចិត្តេន, បទេ ចិត្តំ បសាទយិំ.

១៨. ‘‘កោរណ្ឌំ បុប្ផិតំ ទិស្វា, បាទបំ ធរណីរុហំ;

សកោសកំ គហេត្វាន, បទសេដ្ឋមបូជយិំ [បទសេដ្ឋេ អបូជយិំ (សី. បី.)].

១៩. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២០. ‘‘យំ យំ យោនុបបជ្ជាមិ, ទេវត្តំ អថ មានុសំ;

កោរណ្ឌកឆវិ ហោមិ, សុប្បភាសោ [សបភាសោ (សី. ស្យា. បី. ក.)] ភវាមហំ.

២១. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បទបូជាយិទំ ផលំ.

២២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កោរណ្ឌបុប្ផិយោ ថេរោ ឥមា គាថាយោ

អភាសិត្ថាតិ.

កោរណ្ឌបុប្ផិយត្ថេរស្សាបទានំ តតិយំ.