៩. បានធិទាយកត្ថេរអបទានំ

៧១. ‘‘អនោមទស្សី ភគវា, លោកជេដ្ឋោ នរាសភោ;

ទិវាវិហារា និក្ខម្ម, បថមារុហិ [បីតិមារុយ្ហិ (ស្យា.)] ចក្ខុមា.

៧២. ‘‘បានធិំ សុកតំ គយ្ហ, អទ្ធានំ បដិបជ្ជហំ;

តត្ថទ្ទសាសិំ សម្ពុទ្ធំ, បត្តិកំ ចារុទស្សនំ.

៧៣. ‘‘សកំ ចិត្តំ បសាទេត្វា, នីហរិត្វាន បានធិំ;

បាទមូលេ ឋបេត្វាន, ឥទំ វចនមព្រវិំ.

៧៤. ‘‘‘អភិរូហ មហាវីរ, សុគតិន្ទ វិនាយក;

ឥតោ ផលំ លភិស្សាមិ, សោ មេ អត្ថោ សមិជ្ឈតុ’.

៧៥. ‘‘អនោមទស្សី ភគវា, លោកជេដ្ឋោ នរាសភោ;

បានធិំ អភិរូហិត្វា, ឥទំ វចនមព្រវិ.

៧៦. ‘‘‘យោ បានធិំ មេ អទាសិ, បសន្នោ សេហិ បាណិភិ;

តមហំ កិត្តយិស្សាមិ, សុណាថ មម ភាសតោ’.

៧៧. ‘‘ពុទ្ធស្ស គិរមញ្ញាយ, សព្ពេ ទេវា សមាគតា;

ឧទគ្គចិត្តា សុមនា, វេទជាតា កតញ្ជលី.

៧៨. ‘‘បានធីនំ បទានេន, សុខិតោយំ ភវិស្សតិ;

បញ្ចបញ្ញាសក្ខត្តុញ្ច, ទេវរជ្ជំ ករិស្សតិ.

៧៩. ‘‘សហស្សក្ខត្តុំ រាជា ច, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

៨០. ‘‘អបរិមេយ្យេ ឥតោ កប្បេ, ឱក្កាកកុលសម្ភវោ;

គោតមោ នាម គោត្តេន [នាមេន (សព្ពត្ថ)], សត្ថា លោកេ ភវិស្សតិ.

៨១. ‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ.

៨២. ‘‘ទេវលោកេ មនុស្សេ វា, និព្ពត្តិស្សតិ បុញ្ញវា;

ទេវយានបដិភាគំ, យានំ បដិលភិស្សតិ.

៨៣. ‘‘បាសាទា សិវិកា វយ្ហំ, ហត្ថិនោ សមលង្កតា;

រថា វាជញ្ញសំយុត្តា, សទា បាតុភវន្តិ មេ.

៨៤. ‘‘អគារា និក្ខមន្តោបិ, រថេន និក្ខមិំ អហំ;

កេសេសុ ឆិជ្ជមានេសុ, អរហត្តមបាបុណិំ.

៨៥. ‘‘លាភា មយ្ហំ សុលទ្ធំ មេ, វាណិជ្ជំ សុប្បយោជិតំ;

ទត្វាន បានធិំ ឯកំ, បត្តោម្ហិ អចលំ បទំ.

៨៦. ‘‘អបរិមេយ្យេ ឥតោ កប្បេ, យំ បានធិមទាសហំ;

ទុគ្គតិំ នាភិជានាមិ, បានធិស្ស ឥទំ ផលំ.

៨៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៨៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៨៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បានធិទាយកោ ថេរោ ឥមា គាថាយោ

អភាសិត្ថាតិ.

បានធិទាយកត្ថេរស្សាបទានំ នវមំ.