១០. បុលិនចង្កមិយត្ថេរអបទានំ

៩០. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

វាតមិគំ គវេសន្តោ, ចង្កមំ អទ្ទសំ អហំ.

៩១. ‘‘ឧច្ឆង្គេន បុលិនំ [បុឡិនំ (សី. ស្យា. បី. ក.)] គយ្ហ, ចង្កមេ ឱកិរិំ អហំ;

បសន្នចិត្តោ សុមនោ, សុគតស្ស សិរីមតោ.

៩២. ‘‘ឯកតិំសេ ឥតោ កប្បេ, បុលិនំ ឱកិរិំ អហំ;

ទុគ្គតិំ នាភិជានាមិ, បុលិនស្ស ឥទំ ផលំ.

៩៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៩៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៩៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុលិនចង្កមិយោ ថេរោ ឥមា គាថាយោ

អភាសិត្ថាតិ.

បុលិនចង្កមិយត្ថេរស្សាបទានំ ទសមំ.

នឡមាលិវគ្គោ អដ្ឋចត្តាលីសមោ.