១០. និមិត្តព្យាករណិយត្ថេរអបទានំ

៥៩. ‘‘អជ្ឈោគាហេត្វា ហិមវំ, មន្តេ វាចេ មហំ តទា;

ចតុបញ្ញាសសហស្សានិ, សិស្សា មយ្ហំ ឧបដ្ឋហុំ.

៦០. ‘‘អធិតា វេទគូ សព្ពេ, ឆឡង្គេ បារមិំ គតា;

សកវិជ្ជាហុបត្ថទ្ធា, ហិមវន្តេ វសន្តិ តេ.

៦១. ‘‘ចវិត្វា តុសិតា កាយា, ទេវបុត្តោ មហាយសោ;

ឧប្បជ្ជិ មាតុកុច្ឆិស្មិំ, សម្បជានោ បតិស្សតោ.

៦២. ‘‘សម្ពុទ្ធេ ឧបបជ្ជន្តេ, ទសសហស្សិ កម្បថ;

អន្ធា ចក្ខុំ អលភិំសុ, ឧប្បជ្ជន្តម្ហិ នាយកេ.

៦៣. ‘‘សព្ពាការំ បកម្បិត្ថ, កេវលា វសុធា អយំ;

និគ្ឃោសសទ្ទំ សុត្វាន, ឧព្ពិជ្ជិំសុ [វិម្ហយិំសុ (ស្យា. ក.)] មហាជនា.

៦៤. ‘‘សព្ពេ ជនា សមាគម្ម, អាគច្ឆុំ មម សន្តិកំ;

វសុធាយំ បកម្បិត្ថ, កិំ វិបាកោ ភវិស្សតិ.

៦៥. ‘‘អវចាសិំ [វិទស្សាមិ (ស្យា.)] តទា តេសំ, មា ភេថ [មា រោទ (ក.), មាភាយិត្ថ (ស្យា.)] នត្ថិ វោ ភយំ;

វិសដ្ឋា ហោថ សព្ពេបិ, ឧប្បាទោយំ សុវត្ថិកោ [សុខត្ថិកោ (ស្យា.)].

៦៦. ‘‘អដ្ឋហេតូហិ សម្ផុស្ស [អដ្ឋហេតូហិ សម្ផស្ស (ស្យា. បី.), អត្ថហេតុ និសំសយំ (ក.)], វសុធាយំ បកម្បតិ;

តថា និមិត្តា ទិស្សន្តិ, ឱភាសោ វិបុលោ មហា.

៦៧. ‘‘អសំសយំ ពុទ្ធសេដ្ឋោ, ឧប្បជ្ជិស្សតិ ចក្ខុមា;

សញ្ញាបេត្វាន ជនតំ, បញ្ចសីលេ កថេសហំ.

៦៨. ‘‘សុត្វាន បញ្ច សីលានិ, ពុទ្ធុប្បាទញ្ច ទុល្លភំ;

ឧព្ពេគជាតា សុមនា, តុដ្ឋហដ្ឋា អហំសុ តេ.

៦៩. ‘‘ទ្វេនវុតេ ឥតោ កប្បេ, យំ និមិត្តំ វិយាករិំ;

ទុគ្គតិំ នាភិជានាមិ, ព្យាករណស្សិទំ ផលំ.

៧០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៧១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៧២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា និមិត្តព្យាករណិយោ ថេរោ ឥមា

គាថាយោ អភាសិត្ថាតិ.

និមិត្តព្យាករណិយត្ថេរស្សាបទានំ ទសមំ.

សាលកុសុមិយវគ្គោ សត្តចត្តាលីសមោ.