៤. សត្តកទម្ពបុប្ផិយត្ថេរអបទានំ

៦១. ‘‘ហិមវន្តស្សាវិទូរេ, កុក្កុដោ [កទម្ពោ (សី. ស្យា. បី.)] នាម បព្ពតោ;

តម្ហិ បព្ពតបាទម្ហិ, សត្ត ពុទ្ធា វសិំសុ តេ.

៦២. ‘‘កទម្ពំ បុប្ផិតំ ទិស្វា, បគ្គហេត្វាន អញ្ជលិំ;

សត្ត មាលា គហេត្វាន, បុញ្ញចិត្តេន [បុណ្ណចិត្តេន (ក.)] ឱកិរិំ.

៦៣. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៦៤. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

៦៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៦៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៦៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សត្តកទម្ពបុប្ផិយោ ថេរោ ឥមា

គាថាយោ អភាសិត្ថាតិ.

សត្តកទម្ពបុប្ផិយត្ថេរស្សាបទានំ ចតុត្ថំ.