១. ភទ្ទាលិត្ថេរអបទានំ

១. ‘‘សុមេធោ នាម សម្ពុទ្ធោ, អគ្គោ ការុណិកោ មុនិ;

វិវេកកាមោ លោកគ្គោ, ហិមវន្តមុបាគមិ.

២. ‘‘អជ្ឈោគាហេត្វា ហិមវំ, សុមេធោ លោកនាយកោ;

បល្លង្កំ អាភុជិត្វាន, និសីទិ បុរិសុត្តមោ.

៣. ‘‘សមាធិំ សោ សមាបន្នោ, សុមេធោ លោកនាយកោ;

សត្តរត្តិន្ទិវំ ពុទ្ធោ, និសីទិ បុរិសុត្តមោ.

៤. ‘‘ខារិភារំ [ខារិកាជំ (សី.)] គហេត្វាន, វនមជ្ឈោគហិំ អហំ;

តត្ថទ្ទសាសិំ សម្ពុទ្ធំ, ឱឃតិណ្ណមនាសវំ.

៥. ‘‘សម្មជ្ជនិំ គហេត្វាន, សម្មជ្ជិត្វាន អស្សមំ;

ចតុទណ្ឌេ ឋបេត្វាន, អកាសិំ មណ្ឌបំ តទា.

៦. ‘‘សាលបុប្ផំ អាហរិត្វា, មណ្ឌបំ ឆាទយិំ អហំ;

បសន្នចិត្តោ សុមនោ, អភិវន្ទិំ តថាគតំ.

៧. ‘‘យំ វទន្តិ សុមេធោតិ, ភូរិបញ្ញំ សុមេធសំ;

ភិក្ខុសង្ឃេ និសីទិត្វា, ឥមា គាថា អភាសថ.

៨. ‘‘‘ពុទ្ធស្ស គិរមញ្ញាយ, សព្ពេ ទេវា សមាគមុំ;

អសំសយំ ពុទ្ធសេដ្ឋោ, ធម្មំ ទេសេតិ ចក្ខុមា.

៩. ‘‘‘សុមេធោ នាម សម្ពុទ្ធោ, អាហុតីនំ បដិគ្គហោ;

ទេវសង្ឃេ និសីទិត្វា, ឥមា គាថា អភាសថ.

១០. ‘‘‘យោ មេ សត្តាហំ មណ្ឌបំ, ធារយី សាលឆាទិតំ;

តមហំ កិត្តយិស្សាមិ, សុណាថ មម ភាសតោ.

១១. ‘‘‘ទេវភូតោ មនុស្សោ វា, ហេមវណ្ណោ ភវិស្សតិ;

បហូតភោគោ ហុត្វាន, កាមភោគី ភវិស្សតិ.

១២. ‘‘‘សដ្ឋិ នាគសហស្សានិ, សព្ពាលង្ការភូសិតា;

សុវណ្ណកច្ឆា មាតង្គា, ហេមកប្បនវាសសា.

១៣. ‘‘‘អារូឡ្ហា គាមណីយេហិ, តោមរង្កុសបាណិភិ;

សាយំ បាតោ [សាយបាតោ (បី.)] ឧបដ្ឋានំ, អាគមិស្សន្តិមំ នរំ;

តេហិ នាគេហិ បរិវុតោ, រមិស្សតិ អយំ នរោ.

១៤. ‘‘‘សដ្ឋិ អស្សសហស្សានិ, សព្ពាលង្ការភូសិតា;

អាជានីយាវ ជាតិយា, សិន្ធវា សីឃវាហិនោ.

១៥. ‘‘‘អារូឡ្ហា គាមណីយេហិ, ឥល្លិយាចាបធារិភិ;

បរិវារេស្សន្តិមំ និច្ចំ, ពុទ្ធបូជាយិទំ ផលំ.

១៦. ‘‘‘សដ្ឋិ រថសហស្សានិ, សព្ពាលង្ការភូសិតា;

ទីបា អថោបិ វេយគ្ឃា, សន្នទ្ធា ឧស្សិតទ្ធជា.

១៧. ‘‘‘អារូឡ្ហា គាមណីយេហិ, ចាបហត្ថេហិ វម្មិភិ;

បរិវារេស្សន្តិមំ និច្ចំ, ពុទ្ធបូជាយិទំ ផលំ.

១៨. ‘‘‘សដ្ឋិ គាមសហស្សានិ, បរិបុណ្ណានិ សព្ពសោ;

បហូតធនធញ្ញានិ, សុសមិទ្ធានិ សព្ពសោ;

សទា បាតុភវិស្សន្តិ, ពុទ្ធបូជាយិទំ ផលំ.

១៩. ‘‘‘ហត្ថី អស្សា រថា បត្តី, សេនា ច ចតុរង្គិនី;

បរិវារេស្សន្តិមំ និច្ចំ, ពុទ្ធបូជាយិទំ ផលំ.

២០. ‘‘‘អដ្ឋារសេ កប្បសតេ, ទេវលោកេ រមិស្សតិ;

សហស្សក្ខត្តុំ រាជា ច, ចក្កវត្តី ភវិស្សតិ.

២១. ‘‘‘សតានំ តីណិក្ខត្តុញ្ច, ទេវរជ្ជំ ករិស្សតិ;

បទេសរជ្ជំ វិបុលំ, គណនាតោ អសង្ខិយំ.

២២. ‘‘‘តិំសកប្បសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

២៣. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, វិហរិស្សតិនាសវោ’.

២៤. ‘‘តិំសកប្បសហស្សម្ហិ, អទ្ទសំ លោកនាយកំ;

ឯត្ថន្តរមុបាទាយ, គវេសិំ អមតំ បទំ.

២៥. ‘‘លាភា មយ្ហំ សុលទ្ធំ មេ, យមហញ្ញាសិ សាសនំ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

២៦. ‘‘នមោ តេ បុរិសាជញ្ញ, នមោ តេ បុរិសុត្តម;

តវ ញាណំ បកិត្តេត្វា, បត្តោម្ហិ អចលំ បទំ.

២៧. ‘‘យំ យំ យោនុបបជ្ជាមិ, ទេវត្តំ អថ មានុសំ;

សព្ពត្ថ សុខិតោ ហោមិ, ផលំ មេ ញាណកិត្តនេ.

២៨. ‘‘ឥទំ បច្ឆិមកំ មយ្ហំ, ចរិមោ វត្តតេ ភវោ;

នាគោវ ពន្ធនំ ឆេត្វា, វិហរាមិ អនាសវោ.

២៩. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៣០. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៣១. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ភទ្ទាលិត្ថេរោ ឥមា គាថាយោ អភាសិត្ថាតិ.

ភទ្ទាលិត្ថេរស្សាបទានំ បឋមំ.