៩. ធម្មចក្កិកត្ថេរអបទានំ

១០២. ‘‘សិទ្ធត្ថស្ស ភគវតោ, សីហាសនស្ស សម្មុខា;

ធម្មចក្កំ មេ ឋបិតំ, សុកតំ វិញ្ញុវណ្ណិតំ.

១០៣. ‘‘ចារុវណ្ណោវ សោភាមិ, សយោគ្គពលវាហនោ;

បរិវារេន្តិ មំ និច្ចំ, អនុយន្តា ពហុជ្ជនា.

១០៤. ‘‘សដ្ឋិតូរិយសហស្សេហិ, បរិចារេមហំ សទា;

បរិវារេន សោភាមិ, បុញ្ញកម្មស្សិទំ ផលំ.

១០៥. ‘‘ចតុន្នវុតិតោ កប្បេ, យំ ចក្កំ ឋបយិំ អហំ;

ទុគ្គតិំ នាភិជានាមិ, ធម្មចក្កស្សិទំ ផលំ.

១០៦. ‘‘ឥតោ ឯកាទសេ កប្បេ, អដ្ឋាសិំសុ ជនាធិបា;

សហស្សរាជនាមេន, ចក្កវត្តី មហព្ពលា.

១០៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធម្មចក្កិកោ ថេរោ ឥមា គាថាយោ អភាសិត្ថាតិ.

ធម្មចក្កិកត្ថេរស្សាបទានំ នវមំ.