៧. លសុណទាយកត្ថេរអបទានំ

៨៩. ‘‘ហិមវន្តស្សាវិទូរេ, តាបសោ អាសហំ តទា;

លសុណំ ឧបជីវាមិ, លសុណំ មយ្ហភោជនំ.

៩០. ‘‘ខារិយោ បូរយិត្វាន, សង្ឃារាមមគច្ឆហំ;

ហដ្ឋោ ហដ្ឋេន ចិត្តេន, សង្ឃស្ស លសុណំ អទំ.

៩១. ‘‘វិបស្សិស្ស នរគ្គស្ស, សាសនេ និរតស្សហំ;

សង្ឃស្ស លសុណំ ទត្វា, កប្បំ សគ្គម្ហិ មោទហំ.

៩២. ‘‘ឯកនវុតិតោ កប្បេ, លសុណំ យមទំ តទា;

ទុគ្គតិំ នាភិជានាមិ, លសុណស្ស ឥទំ ផលំ.

៩៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា លសុណទាយកោ ថេរោ ឥមា គាថាយោ អភាសិត្ថាតិ;

លសុណទាយកត្ថេរស្សាបទានំ សត្តមំ.