៥. មោឃរាជត្ថេរអបទានំ

៦៤. ‘‘អត្ថទស្សី តុ ភគវា, សយម្ភូ អបរាជិតោ;

ភិក្ខុសង្ឃបរិព្យូឡ្ហោ, រថិយំ បដិបជ្ជថ.

៦៥. ‘‘សិស្សេហិ សម្បរិវុតោ, ឃរម្ហា អភិនិក្ខមិំ;

និក្ខមិត្វានហំ តត្ថ, អទ្ទសំ លោកនាយកំ.

៦៦. ‘‘អភិវាទិយ សម្ពុទ្ធំ, សិរេ កត្វាន អញ្ជលិំ;

សកំ ចិត្តំ បសាទេត្វា, សន្ថវិំ លោកនាយកំ.

៦៧. ‘‘យាវតា រូបិនោ សត្តា, អរូបី វា អសញ្ញិនោ;

សព្ពេ តេ តវ ញាណម្ហិ, អន្តោ ហោន្តិ សមោគធា.

៦៨. ‘‘សុខុមច្ឆិកជាលេន, ឧទកំ យោ បរិក្ខិបេ;

យេ កេចិ ឧទកេ បាណា, អន្តោជាលេ ភវន្តិ តេ.

៦៩. ‘‘យេសញ្ច ចេតនា អត្ថិ, រូបិនោ ច អរូបិនោ;

សព្ពេ តេ តវ ញាណម្ហិ, អន្តោ ហោន្តិ សមោគធា.

៧០. ‘‘សមុទ្ធរសិមំ លោកំ, អន្ធការសមាកុលំ;

តវ ធម្មំ សុណិត្វាន, កង្ខាសោតំ តរន្តិ តេ.

៧១. ‘‘អវិជ្ជានិវុតេ លោកេ, អន្ធការេន ឱត្ថដេ;

តវ ញាណម្ហិ ជោតន្តេ, អន្ធការា បធំសិតា.

៧២. ‘‘តុវំ ចក្ខូសិ សព្ពេសំ, មហាតមបនូទនោ;

តវ ធម្មំ សុណិត្វាន, និព្ពាយតិ ពហុជ្ជនោ.

៧៣. ‘‘បុដកំ បូរយិត្វាន [បីឋរំ (សី.), បុតរំ (ស្យា.)], មធុខុទ្ទមនេឡកំ;

ឧភោ ហត្ថេហិ បគ្គយ្ហ, ឧបនេសិំ មហេសិនោ.

៧៤. ‘‘បដិគ្គណ្ហិ មហាវីរោ, សហត្ថេន មហា ឥសី;

ភុញ្ជិត្វា តញ្ច សព្ពញ្ញូ, វេហាសំ នភមុគ្គមិ.

៧៥. ‘‘អន្តលិក្ខេ ឋិតោ សត្ថា, អត្ថទស្សី នរាសភោ;

មម ចិត្តំ បសាទេន្តោ, ឥមា គាថា អភាសថ.

៧៦. ‘‘‘យេនិទំ ថវិតំ ញាណំ, ពុទ្ធសេដ្ឋោ ច ថោមិតោ;

តេន ចិត្តប្បសាទេន, ទុគ្គតិំ សោ ន គច្ឆតិ.

៧៧. ‘‘‘ចតុទ្ទសញ្ចក្ខត្តុំ [ចតុសដ្ឋិញ្ច (ស្យា.)] សោ, ទេវរជ្ជំ ករិស្សតិ;

បថព្យា រជ្ជំ អដ្ឋសតំ, វសុធំ អាវសិស្សតិ.

៧៨. ‘‘‘បញ្ចេវ សតក្ខត្តុញ្ច [អថ បញ្ចសតក្ខត្តុំ (សី.)], ចក្កវត្តី ភវិស្សតិ;

បទេសរជ្ជំ អសង្ខេយ្យំ, មហិយា ការយិស្សតិ.

៧៩. ‘‘‘អជ្ឈាយកោ មន្តធរោ, តិណ្ណំ វេទាន បារគូ;

គោតមស្ស ភគវតោ, សាសនេ បព្ពជិស្សតិ.

៨០. ‘‘‘គម្ភីរំ និបុណំ អត្ថំ, ញាណេន វិចិនិស្សតិ;

មោឃរាជាតិ នាមេន, ហេស្សតិ សត្ថុ សាវកោ.

៨១. ‘‘‘តីហិ វិជ្ជាហិ សម្បន្នំ, កតកិច្ចមនាសវំ;

គោតមោ សត្ថវាហគ្គោ, ឯតទគ្គេ ឋបេស្សតិ’.

៨២. ‘‘ហិត្វា មានុសកំ យោគំ, ឆេត្វាន ភវពន្ធនំ;

សព្ពាសវេ បរិញ្ញាយ, វិហរាមិ អនាសវោ.

៨៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មោឃរាជោ ថេរោ ឥមា គាថាយោ អភាសិត្ថាតិ;

មោឃរាជត្ថេរស្សាបទានំ បញ្ចមំ.