១. ពោធិវន្ទកត្ថេរអបទានំ

១. ‘‘បាដលិំ ហរិតំ ទិស្វា, បាទបំ ធរណីរុហំ;

ឯកំសំ អញ្ជលិំ កត្វា, អវន្ទិំ បាដលិំ អហំ.

២. ‘‘អញ្ជលិំ បគ្គហេត្វាន, គរុំ កត្វាន មានសំ;

អន្តោសុទ្ធំ ពហិសុទ្ធំ, សុវិមុត្តមនាសវំ.

៣. ‘‘វិបស្សិំ លោកមហិតំ, ករុណាញាណសាគរំ;

សម្មុខា វិយ សម្ពុទ្ធំ, អវន្ទិំ បាដលិំ អហំ.

៤. ‘‘ឯកនវុតិតោ កប្បេ, យំ ពោធិមភិវន្ទហំ;

ទុគ្គតិំ នាភិជានាមិ, វន្ទនាយ ឥទំ ផលំ.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ពោធិវន្ទកោ ថេរោ ឥមា គាថាយោ អភាសិត្ថាតិ.

ពោធិវន្ទកត្ថេរស្សាបទានំ បឋមំ.