៩. តិមិរបុប្ផិយត្ថេរអបទានំ

៣១. ‘‘ចន្ទភាគានទីតីរេ, អនុសោតំ វជាមហំ;

អទ្ទសំ វិរជំ ពុទ្ធំ, សាលរាជំវ ផុល្លិតំ.

៣២. ‘‘បសន្នចិត្តោ សុមនោ, បច្ចេកមុនិមុត្តមំ;

គហេត្វា តិមិរំ បុប្ផំ, មត្ថកេ ឱកិរិំ អហំ.

៣៣. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិមិរបុប្ផិយោ ថេរោ ឥមា គាថាយោ អភាសិត្ថាតិ.

តិមិរបុប្ផិយត្ថេរស្សាបទានំ នវមំ.