១. មន្ទារវបុប្ផិយត្ថេរអបទានំ

១. ‘‘តាវតិំសា ឥធាគន្ត្វា, មង្គលោ នាម មាណវោ;

មន្ទារវំ គហេត្វាន, វិបស្សិស្ស មហេសិនោ.

២. ‘‘សមាធិនា និសិន្នស្ស, មត្ថកេ ធារយិំ អហំ;

សត្តាហំ ធារយិត្វាន, ទេវលោកំ បុនាគមិំ.

៣. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា មន្ទារវបុប្ផិយោ ថេរោ ឥមា គាថាយោ អភាសិត្ថាតិ.

មន្ទារវបុប្ផិយត្ថេរស្សាបទានំ បឋមំ.