២. យវកលាបិយត្ថេរអបទានំ

៦. ‘‘នគរេ អរុណវតិយា, អាសិំ យវសិកោ តទា;

បន្ថេ ទិស្វាន សម្ពុទ្ធំ, យវកលាបំ សន្ថរិំ [យវកលាបមវត្ថរិំ (សី.)].

៧. ‘‘អនុកម្បកោ ការុណិកោ, សិខី លោកគ្គនាយកោ;

មម សង្កប្បមញ្ញាយ, និសីទិ យវសន្ថរេ.

៨. ‘‘ទិស្វា និសិន្នំ វិមលំ, មហាឈាយិំ វិនាយកំ;

បាមោជ្ជំ ជនយិត្វាន, តត្ថ កាលង្កតោ អហំ.

៩. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, យវត្ថរេ ឥទំ ផលំ.

១០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា យវកលាបិយោ ថេរោ ឥមា គាថាយោ អភាសិត្ថាតិ.

យវកលាបិយត្ថេរស្សាបទានំ ទុតិយំ.