៣. បុន្នាគបុប្ផិយត្ថេរអបទានំ

១៤. ‘‘កាននំ វនមោគយ្ហ, វសាមិ លុទ្ទកោ អហំ;

បុន្នាគំ បុប្ផិតំ ទិស្វា, ពុទ្ធសេដ្ឋំ អនុស្សរិំ.

១៥. ‘‘តំ បុប្ផំ ឱចិនិត្វាន, សុគន្ធំ គន្ធិតំ សុភំ;

ថូបំ កត្វាន បុលិនេ, ពុទ្ធស្ស អភិរោបយិំ.

១៦. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៧. ‘‘ឯកម្ហិ នវុតេ កប្បេ, ឯកោ អាសិំ តមោនុទោ;

សត្តរតនសម្បន្នោ, ចក្កវត្តី មហព្ពលោ.

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុន្នាគបុប្ផិយោ ថេរោ ឥមា គាថាយោ អភាសិត្ថាតិ.

បុន្នាគបុប្ផិយត្ថេរស្សាបទានំ តតិយំ.