៥. និមិត្តសញ្ញកត្ថេរអបទានំ

២៨. ‘‘ចន្ទភាគានទីតីរេ, វសាមិ អស្សមេ អហំ;

សុវណ្ណមិគមទ្ទក្ខិំ, ចរន្តំ វិបិនេ អហំ.

២៩. ‘‘មិគេ ចិត្តំ បសាទេត្វា, លោកជេដ្ឋំ អនុស្សរិំ;

តេន ចិត្តប្បសាទេន, អញ្ញេ ពុទ្ធេ អនុស្សរិំ.

៣០. ‘‘អព្ភតីតា ច យេ ពុទ្ធា, វត្តមានា អនាគតា;

ឯវមេវំ វិរោចន្តិ, មិគរាជាវ តេ តយោ.

៣១. ‘‘ចតុន្នវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

៣២. ‘‘សត្តវីសេ ឥតោ កប្បេ, ឯកោ អាសិំ មហីបតិ;

អរញ្ញសត្ថោ នាមេន, ចក្កវត្តី មហព្ពលោ.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា និមិត្តសញ្ញកោ ថេរោ ឥមា គាថាយោ អភាសិត្ថាតិ.

និមិត្តសញ្ញកត្ថេរស្សាបទានំ បញ្ចមំ.