៣. ហាសជនកត្ថេរអបទានំ

១៣. ‘‘ទុមគ្គេ បំសុកូលកំ [បំសុកូលិកំ (ស្យា. ក.)], លគ្គំ ទិស្វាន សត្ថុនោ;

អញ្ជលិំ បគ្គហេត្វាន, ភិយ្យោ ឧច្ចារិតំ មយា.

១៤. ‘‘ទូរតោ បន ទិស្វាន [បតិទិស្វាន (សី. ស្យា.)], ហាសោ មេ ឧទបជ្ជថ;

អញ្ជលិំ បគ្គហេត្វាន, ភិយ្យោ ចិត្តំ បសាទយិំ.

១៥. ‘‘ឯកនវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

១៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ហាសជនកោ ថេរោ ឥមា គាថាយោ អភាសិត្ថាតិ.

ហាសជនកត្ថេរស្សាបទានំ តតិយំ.