១. ឧមាបុប្ផិយត្ថេរអបទានំ

១. ‘‘សមាហិតំ សមាបន្នំ, សិទ្ធត្ថមបរាជិតំ;

សមាធិនា ឧបវិដ្ឋំ, អទ្ទសាហំ នរុត្តមំ.

២. ‘‘ឧមាបុប្ផំ គហេត្វាន, ពុទ្ធស្ស អភិរោបយិំ;

សព្ពបុប្ផា ឯកសីសា, ឧទ្ធំវណ្ដា អធោមុខា.

៣. ‘‘សុចិត្តា វិយ តិដ្ឋន្តេ, អាកាសេ បុប្ផសន្ថរា;

តេន ចិត្តប្បសាទេន, តុសិតំ ឧបបជ្ជហំ.

៤. ‘‘ចតុន្នវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៥. ‘‘បញ្ចបញ្ញាសិតោ កប្បេ, ឯកោ អាសិំ មហីបតិ;

សមន្តឆទនោ នាម, ចក្កវត្តី មហព្ពលោ.

៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ.

ឥត្ថំ សុទំ អាយស្មា ឧមាបុប្ផិយោ ថេរោ ឥមា គាថាយោ អភាសិត្ថាតិ.

ឧមាបុប្ផិយត្ថេរស្សាបទានំ បឋមំ.